Álemdik dodanyń aýyly alys emes

Astanadaǵy Jaqsylyq Úsh­kempirov atyndaǵy «Jekpe-jek» sport kesheninde ótken oıynda alań ıeleri birinshi taımnyń 8-mınýtyna deıin 0:2 esebimen jeńilip jatyp, match sońynda tamasha kambek jasady. Elordadaǵy kezdesý de Bakýdegi matchtyń sse­narııimen bastaldy. Bir-biriniń qyr-syryn jaqsy biletin komandalar alǵashqy mınýttardan ańdysyp jatpaı, birden iske kiristi. Match basynda Dýg­las pen Birjan Orazovta gol soǵatyn tamasha múmkindik bol­ǵanymen, ekeýi de ońtaıly sát­ti paıdalana almady. Esesine 4-mınýtta Igıta qorǵaǵan qaq­paǵa alǵashqy qaýipti shabýylyn uıymdastyrǵan qonaqtar birinshi múmkindiginen-aq oıyn­nyń esebin ashty. Edsondy qa­py qaldyryp, aıyp dobynyń ma­ńaıynan sol aıaǵymen joı­qyn soqqy jasaǵan Amadeý Ázer­baıjan quramasyn esepte alǵa shyǵardy. Arada tórt mınýt ótkende qonaqtar eseptegi basymdyǵyn nyǵaıtty – 2:0. Bul joly da gol bizdiń qaqpamyz­­ǵa Edsonnyń qateliginen keıin soǵyldy. Qorǵaýshymyzdyń alań ortasyndaǵy óreskel qa­teliginen soń qarsylas koman­danyń fýtzalshylary bir­den qarymta shabýylǵa shyǵyp, Kardozonyń tepken doby qaqpa torynda týlady.

Qaqpamyzǵa engen ekinshi goldan keıin Kaka bapker birden taım-aýt alyp, fýtzalshylarǵa qajetti nusqaýlyǵyn berip, jigitterdi jigerlendirdi. Shaǵyn úzilisten soń ulttyq quramanyń oıyny jandana tústi. Sonyń nátıjesinde 13-mınýtta Leo alań ortasynan toǵyzdyqty dál kózdep, tablodaǵy kórsetkishti bir golǵa qysqartsa, 18-mınýtta Birjan Orazov Leonyń pasynan keıin tarazy basyn teńestirdi – 2:2. Sóıtip, komandalar úziliske teń eseppen shyqty.

Álem chempıonatyna shyǵý úshin irikteý kezeńindegi árbir oıynda jeńiske jetý asa ma­ńyzdy ekenin jete túsingen jer­lesterimiz ekinshi taımdy da bel­sendi bastap, 22-mınýtta esepte alǵa shyqty – 3:2. Bul joly Dýglas mergendigimen kózge tús­ti. Match sońyna deıin 3:2 ese­bi saqtalyp, ulttyq qurama fýt­zalshylary jigerli jeńis­ke qol jetkizdi. Sóıtip, irikteý ke­ze­ńindegi tórt oıynnyń bar­ly­ǵynda qarsylastarynan basym túsken jerlesterimiz 100 paıyzdyq kórsetkishpen týrnır kestesinde jeke-dara kósh bastady.

Eki ujym arasyndaǵy al­ǵashqy oıynǵa qaraǵanda bul jolǵy matchta Ázerbaıjan fýt­­­­zal­shylary jaqsy daıyn­dyqpen kelgeni baıqalyp tur­­­dy. Matchtyń birinshi mı­ný­ty­nan sońǵy sekýndyna deıin qonaqtar oıyndaǵy ár­bir dopqa talas júrgizip, bel­sendi oıyn órnegin kórsetti. De­genmen el quramasy bul match­ta halyqaralyq oıyndar­da­ǵy tájirıbesi men Rıkardo Kakanyń­ utymdy taktıkasynyń arqa­synda jeńiske jete bildi.

A tobynda bir kún buryn Amsterdamda ótken Nıderland pen Rýmynııa quramalary ara­syndaǵy matchta taraptar upaı bólisýge májbúr boldy – 1:1. Sóıtip, elıtaly ke­zeń­niń tórtinshi týrynan ke­ıin Qazaqstan quramasy 12 upaı­men «A» tobynda kósh bastap keledi. Ekinshi orynǵa 7 upaıy bar Rýmynııa fýtzalshylary jaıǵassa, úshinshi orynǵa tórt oıynda bir ǵana jeńisi bar Ázerbaıjan quramasy tu­raqtady. Al Rýmynııamen ót­ken oıynda osy irikteýdegi al­ǵashqy upaıyna qol jetkizgen Nıderland kósh sońynda qalyp qoıdy.

Endi Qazaqstan ulttyq qu­ramasy toptaǵy kelesi oıynyn 14 jeltoqsan kúni elordada Nıderlandpen ótkizedi. Eger osy oıynda jerlesterimiz jeńiske jetetin bolsa, onda ulttyq qu­rama merziminen buryn ke­lesi jyly О́zbekstannyń bas sha­hary – Tashkentte jalaýy jelbireıtin álem chempıonatyna joldama alady. Al toptaǵy sońǵy oıynyn Rıkardo Kaka shákirtteri 20 jeltoqsanda syrt alańda Rýmynııamen ótkizedi.