Alda kele jatqan Respýblıka kúnine oraı, Qostanaıdaǵy «Qonaı» shaǵyn aýdanynda kópqabatty turǵyn úı paıdalanýǵa berildi. «Nurly jer» memlekettik baǵdarlamasy aıasynda boı kótergen jańa úıge baspana kezeginde turǵan kópbalaly otbasylar, múmkindigi shekteýli jandar men kámelet jasyna tolǵan jetim balalar qonystandy. Eńseli úıdiń aýlasynda ótken qonys qýanyshyna qala ákimi Marat Júndibaev qatysyp, baspanaly bolǵan otbasylarǵa páter kiltterin tabys etti.
Birneshe jyl buryn qala shetindegi taqyr jerge salyna bastaǵan turǵyn úılerdiń búginde qatary kóbeıip, endi eńse tiktep kele jatqan jańa shaǵyn aýdanǵa aınalǵan. Qazir munda 33 kópqabatty turǵyn úı bar. Jeltoqsan aıynda 900 oqýshyǵa arnalǵan mektep qurylysy aıaqtalyp qalýǵa tıis. Mekteptiń janynan 75 oryndyq balalar shaǵyn ortalyǵy salynyp jatyr. 2024 jyly «Jaıly mektep» ulttyq jobasy aıasynda 600 oryndyq taǵy bir mekteptiń qurylysy bastalady.
Turǵyndar jańa qonystanǵan 83-kvartaldaǵy №1 úıge beınebaqylaý qurylǵysy, domofon, múmkindigi shekteýli jandardyń kirip-shyǵýyna yńǵaıly arnaıy pandýs ornatylǵan. Aýlada balalar alańy, sport alańy, keń avtoturaǵy bar.
Mashmanovtar otbasy buǵan deıin bes balasymen qala irgesine ornalasqan saıajaıdaǵy qýyqtaı bir bólmeli úıdi panalap kelipti. Kópten kútken armany oryndalǵan kópbalaly ana kózindegi qýanysh jasyn jasyra almady.
– Qostanaıǵa 2015 jyly kóship keldik. Úı kezegine osydan úsh jyl buryn turǵanbyz. Bulaısha tez alamyz-aý dep oılamappyn. Búginde elimizde men sııaqty kópbalaly analarǵa úlken qoldaý jasalyp jatyr ǵoı. Sonyń bárin sezinip jatyrmyz. Bes balam bar, úlkeni – 11 jasta, kenjem – úshte. Kópbalaly ana retinde kishkentaılarymnyń keregine jumsaıtyn járdemaqy alyp turamyn. Oblys basshylaryna alǵysym sheksiz, eshqashan jamandyq kórmesin. Búgingi qýanyshymyz barshaǵa juǵysty bolsyn, – deıdi bes baldyrǵannyń anasy Aıgúl Mashmanova.
Qonys qýanyshyna jınalǵandardyń ishinde páter ıeleriniń ata-anasy, jaqyn týystary, áriptes joldastary da júrdi. Balasy baspanaly bolyp jatqan zeınetker Kúljan Kúmisbekova kópshilik aldynda oblys basshylary men qurylysshylarǵa alǵysyn jaýdyryp, qonystanýshylarǵa kól-kósir izgi tilegin arnady.
– On alty nemerem bar. Búgin páter alyp jatqan Tortaı – ulym, Araı – kelinim, ekeýinen bes nemere súıip otyrmyn. Endi, mine, Respýblıka kúni merekesine oraı, balalarym baspanaly bolyp, soǵan tóbemiz kókke jetkendeı qýanyp jatyrmyz. On jyldan beri bireýdiń bosaǵasyn jaldap turdy. Búgin, mine, aq túıeniń qarny jarylyp, tilegim oryndaldy. Qarapaıym halyqqa osyndaı keremet úı salyp berip, qarasyp, qamqorlyq jasap jatqan janashyr memleketimizdiń qýaty artyp, damyp, nyǵaıa bersin! Alla Taǵala birlik atty altyn beldigimizden, yntymaq atty eldigimizden aıyrmasyn! Alda kele jatqan úlken merekemiz – Respýblıka kúni qutty bolsyn! Esh jamandyq bolmasyn! Zaman tynysh bolsyn! – deıdi batagóı ájeı.
Birinshi toptaǵy múgedek, jetim ósken Rýslan Qonaqbaevtyń páter kezeginde turǵanyna baqandaı 14 jyl bolypty. Buǵan deıin memleket ýaqytsha dep bergen bir bólmeni panalap kelgen Rýslan búgin kóppen birge jańa úıdiń birinshi qabatynan bir bólmeli páter aldy.
– Kópbalaly analarǵa qaraǵanda, jetimderge kezekke turyp páter alý qıyn. Sondyqtan búgin óz páterimniń kilti qolyma tıip, qýanyshym qoınyma syımaı tur. Prezıdentimiz áljýaz áleýmettik toptardy baspanamen qamtý, memlekettiń qamqorlyǵyna alý máselesin únemi qadap aıtyp, tıisti oryndarǵa mindettep otyrady. Búgingi qýanysh, bir jaǵynan, osyndaı memlekettik turǵydan jasalyp jatqan janashyrlyqtyń nátıjesi dep bilemin. Teńdik pen ádilet ústemdik qurǵan izgi qoǵamnyń qamqorlyǵyn sezingendeı úlken bir tolqynysta turmyn, – deıdi Rýslan.
Qala ákiminiń aıtýynsha, Qostanaıda bıyl tórt jaldamaly turǵyn úı paıdalanýǵa beriledi.
– Jyl basynda «Áýejaı» shaǵyn aýdanynda bir úıdi el ıgiligine ótkizip berdik. Ekinshisi – búgin, mine, ózderińiz kirip jatqan úı. 24 qazanda «Iýbıleınyı» shaǵyn aýdanynda taǵy bir úı paıdalanýǵa beriledi. Al jyl sońyna qaraı «Aeroport» shaǵyn aýdanyndaǵy kópqabatty úıdiń turǵyndaryna páter kiltin tapsyramyz. Bul tórt úıge bas-aıaǵy 370 otbasy qonystanady. Olardyń 200-den astamy – kópbalaly analar, múmkindigi shekteýli jandar men jetimder. Qonaıda kelesi jyly kópqabatty taǵy 10 úı turǵyzý josparlanyp otyr. Sondaı-aq eki mektep, bir balabaqsha jumys isteıdi. Dárigerlik ambýlatorııa, emhana salynady. Jalpy alǵanda, «Qonaı» shaǵyn aýdany aldaǵy bes-alty jyl ishinde 400 gektar aýmaqty qamtyǵan 80 myń turǵyny bar irgeli eldi mekenge aınalmaq. Keıingi bir-eki jyldyń ishinde jańa shaǵyn aýdanǵa jol salynyp, qazir qoǵamdyq kólikter qatynaıtyn boldy. Kóshelerge jaryq ornatylyp jatyr. Jyl sońyna deıin gaz qubyryn tartý jumystary tolyq aıaqtalyp, ár úıge kógildir otyn kiredi. Munyń syrtynda, bıyl «Qonaıda» 1 500 túp aǵash kósheti otyrǵyzylady. Barshańyzdy shyn júrekten quttyqtaımyn! Otbasylaryńyzǵa amandyq, baqyt, tabys tileımin! Elimiz aman, jurtymyz tynysh bolsyn! Qonysqa qonys qosyla bersin! – dedi Marat Júndibaev.
Saltanatty is-sharadan keıin birneshe páterge kirip shyqqan qala ákimi turǵyndarmen birge jańa úıdiń aýlasyna shyrsha kóshetterin otyrǵyzdy.
Qostanaı oblysy