Álemniń úzdik shahmatshysy, 2013-2023 jyldary álem chempıony degen ataqty eshkimge bermegen, rapıdten de, blısten de dúnıejúzinde óziniń tegeýrinine teń keler qarsylas shydatpaǵan norveg shahmatshysy Magnýs Karlsen qazaq balasynan qıraı jeńildi.
Dohada ótip jatqan Qatar Masters Open halyqaralyq týrnırdiń ekinshi kezeńinde jerlesimiz, álemdik reıtıngte (FIDE) 528-satyda turǵan Álisher Súleımenov Magnýs Karlsenniń oıyn da, oıynyn da shiderlep tastady. 32 jastaǵy Karlsen shahmattyń álemdik reıtınginde top bastap tur.
Qazaqta «jeńilgenniń sózi qurysyn» degen sóz bar. Magnýs Karlsen ózinen on jas kishi, álemdik retıngte qoıý shańnyń arasyndaǵy Álisher Súleımenovtiń jeńisin moıyndaǵysy kelmegendeı syńaı tanytty. «Ol saǵat taǵyp kelipti, mundaı bási joǵary básekede saǵat taǵýǵa ruqsat pa» dep tóreshilerge shaǵymdanypty. Tóreshi ne deıdi? «Aqyldy saǵat» bolmasa boldy, ózgesin taǵýyna ruqsat», depti.
On jyl boıy eshkim jalyn jyǵa almaı álemniń alaqanynda júrgen Magnýsty byltyr 19 jastaǵy amerıkalyq Hans Nıman da jeńgen bolatyn. Karlsen Hans qıturqylyqpen jeńdi dep sotqa deıin baryp tatýlasty. Bul joly Álisherdiń tegeýrinine tótep bere almady. Magnýstyń «qarsylastyń saǵatyna qarap oıymdy tııanaqtaı almadym» degeni rasymen de syltaý. Álisher Súleımenov tarıhı jeńisine alǵashynda ózi de abdyrap qalǵanyn aıtty. Ońaı ma, on jyl boıy álem chempıonatynda eshkimge ese jibermeı kelgen myqtynyń mysyn basý!