Oblystyń elektr jáne jylý energııasyna degen qajettiligin «Tekeli energokesheni» JShS qamtamasyz etedi. Onyń belgilengen elektr qýaty – 24 MVt, jylý qýaty – 42 Gkal/saǵ. Degenmen atalǵan stansa jabdyqtarynyń 67 paıyzy tozǵan. Muny óńirge arnaıy issaparmen kelgen Energetıka mınıstri Almasadam Sátqalıev aıtty.
Energetıka mınıstrligi «Tekeli energokesheni» jaýapkershiligi shekteýli seriktestigi úshin elektr energııasyn óndirýdiń shekti tarıfin 12,98 teńge/kVtsaǵ deńgeıinde bekitken. Bosatý baǵasy 14,79 teńge/kVtsaǵ quraıdy. Jetispeıtin elektr energııasy «Taldyqorǵan kólik-elektrojelilik kompanııasy» aksıonerlik qoǵamynyń elektr energııasyn tasymaldaý jáne taratý jónindegi iri energetıkalyq júıesi arqyly jabylady. Jalpy óńirlik elektr jelilik kompanııanyń aktıvterinde 12 309 km kabeldik jáne áýe elektr berý jelileri bar.Sonymen qatar kásiporyn balansynda 2126 kishi stansa bar. Elektr jelisiniń fızıkalyq tozýy 87 paıyzǵa jetken.
«Oblys aýmaǵynda eldiń gıdroenergetıkalyq resýrstarynyń edáýir qory shoǵyrlanǵan. Búginde óńirde qýaty 159,9 MVt, 11 JEK obektisi jumys isteıdi. Onyń ishinde qýaty 104,9 MVt 9 gıdroelektrstansa bar. Jáne kún, jel elektr stansalary bar. 2027 jylǵa deıin belgilengen qýaty 76 MVt 2 JEK obektisin iske qosý josparlanǵan», dedi A.Sátqalıev.
Qazir óńirde gazdandyrý deńgeıi 41,2 paıyzdy quraıdy. Shamamen 288 myń adam tabıǵı gazǵa qol jetkizgen. Bul kórsetkishke kóńil tolmaıdy. Osy jyly Mınıstrliktiń 003 bıýdjettik baǵdarlamasy boıynsha ákimdikke gazdandyrýǵa 5,4 mlrd teńge bólingen. Bul Eskeldi aýdanynyń 3 eldi mekenin, Qaratal aýdanynyń 1 eldi mekenin, sondaı-aq Taldyqorǵan jáne Tekeli qalalaryn gazdandyrýǵa arnalǵan. Bıyl taǵy 3 aýylǵa kógildir otyn kirgizý josparda bar. Tekeli jáne Úshtóbe qalalaryn gazdandyrý jobalaryn aıaqtaý úshin 2024 jylǵa 3,9 mlrd teńge qarastyrylǵan eken.
«Budan basqa 2024-2026 jyldarǵa respýblıkalyq bıýdjetti Májilis Parlamentinde talqylaý sheńberinde 23 jobaǵa qosymsha 1,9 mlrd teńge bólý máselesi pysyqtalýda. О́ńirdi odan ári gazdandyrý maqsatynda «Taldyqorǵan – Úsharal» gaz qubyryn salý boıynsha iri ınfraqurylymdyq jobany bastaý josparlanyp otyr. Bul 3 aýdandy – Aqsý, Sarqan jáne Alakól aýdandaryn gazdandyrýǵa baǵyttalǵan. Ákimdik jobalaý-smetalyq qujattamany ázirlep jatyr. Jobalaý-smetalyq qujattamany ázirleý aıaqtalǵannan keıin Mınıstrlik ótinimdi qaraýǵa daıyn», deıdi vedomstva basshysy.
Odan keıin agrarly óńirdi basty máselesiniń biri – dızel otyny. Qazir óńirdegi sharýalar janarmaıdyń qymbattyǵyn aıtyp jyl saıyn tilek-aryzyn jetkizýde. Ár maýsym saıyn baǵasy ósken tehnıka azyǵynyń jaıy sharýalardyń shamyna tııýde. Osy rette kúzgi dala jumystaryn ýaqtyly jáne turaqty júrgizý úshin elimizdiń aýyl sharýashylyǵy óndirýshileriniń atyna 426 myń tonnadan astam dızel otynynyń kólemi bekitilgen. Qazir dızel otyny baǵasy 1 lıtr úshin – 250 teńge. Jetisýdyń iri aýyl sharýashylyǵy óndirýshileri úshin 7,9 myń tonna dızel otyny kózdelgen. Búginde, 1,9 myń tonna tıep-jóneltilipti. Mınıstrdiń aıtýynsha, aýyl sharýashylyǵy óndirýshilerine jáne janar-jaǵarmaı quıý stansalaryna dızel otynyn jetkizýdi baqylaý úshin arnaıy PIN-kodtar engizilgen
«Jetisý oblysynda suıytylǵan munaı gazynyń shekti bólshek saýda baǵasy 1 lıtr úshin 76-81 teńgeni qurady. О́ńirde 4 gaz toltyrý stansasy jáne 64 avtomobılge gaz quıý stansasy bar. Oblystaǵy suıytylǵan munaı gazyn tutyný 2022 jyly 20 myń tonnany qurady. Osy jyldyń qańtar-tamyz aılarynda shamamen 28,2 myń tonna tutynyldy. Biz uzaqmerzimdi baǵa turaqtylyǵyn qamtamasyz etý jáne baǵanyń alypsatarlyq kóterilýine jol bermeý maqsatynda suıytylǵan munaı gazy naryǵyn reformalaý boıynsha sharalar qabyldap jatqanymyzdy atap ótkim keledi», dedi mınıstr.
Aıta keteıik, bul sharalar suıytylǵan munaı gazyn satýdyń shekti bólshek saýda baǵasyn belgileý arqyly bólshek saýda baǵasynyń kúrt ósýine jol bermeıdi.
Jıyn sońynda vedomstvo basshysy turǵyndardyń saýalyna jaýap berip, jýrnalıstermen tildesti.
Jetisý oblysy