«Digital Bridge 2023» forýmy 300-den asa IT kompanııany, 100-den asa ınvestordy, álemniń túkpir-túkpirinen 400 spıkerdi jáne 30 elden 100-den asa startapty bir alańǵa jınady. Onda aqparattyq tehnologııalar, data science, Blockchain jáne basqalary boıynsha jergilikti jáne sheteldik IT kompanııalardan 500-ge jýyq bos jumys oryndary usynyldy. Forým aıasynda mańyzdy málimdemeler men tıimdi kelisimsharttar jasaldy.
IT salasy qarqyndy damyp kele jatyr. Innovasııanyń ilgerileýi ekonomıkamyzǵa oń áserin tıgizetini sózsiz. Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın eń iri IT forýmda osy salanyń mańyzyna toqtalyp, aldaǵy ýaqytta elimizdiń áleýetin IT ónimderdi eksporttaı alatyn deńgeıge jetkizý kózdelip otyrǵanyn aıtty. Sonymen qatar mınıstrlik tarapynan atqarylǵan isterge toqtaldy.
– Biz elimizdiń birqatar mınıstrligimen birlesken jobalar jasap shyqtyq. Áriptestikti odan ári jalǵastyra beretin bolamyz. Bizge IT ónimderdi jasap shyǵatyn adamı kapıtaldyń mańyzy joǵary. О́nimderdi shetelge eksporttaý arqyly tabysymyzdy kóbeıte alamyz. Tıisinshe, bul qarjy IT mamandarynyń jalaqysyn kóterýge jáne odan ári salanyń damýyna jumsalady. Sondyqtan osy salada bilikti mamandardy daıarlaý qajet. Biz sol maqsatta birneshe IT mektep ashtyq. Mektep túlekteri qazirdiń ózinde nátıje kórsetip jatyr. Innovasııa salasyndaǵy jetistikter tek mınıstrliktiń jumysynyń nátıjesi emes. Bul isterdiń barlyǵy seriktestik aıasynda jasalyp jatqanyn aıtqym keledi. Eger biz bárimiz, ýnıversıtetter, jas kásipkerler, joǵary oqý oryndary jáne basqa da korporasııalar birigip jumys istesek, alǵa jyljımyz, – dedi mınıstr.
Osy tusta Ǵylym jáne joǵary bilim mınıstri Saıasat Nurbek Prezıdenttiń tapsyrmasy boıynsha elimizdiń úsh joǵary oqý ornynda jasandy ıntellekt mektebi qurylatynyn aıtty.
– Kem degende úsh ýnıversıtet jasandy ıntellekt salasyndaǵy ázirlemelerge mamandanýy kerek. Birinshi mektep Qyzylordada Qorqyt ata atyndaǵy óńirlik ýnıversıtetimizdiń bazasynda bolady. Bul – jetijyldyq baǵdarlama. Biz qazir jasandy ıntellekt mektebin qurý úshin Seýl Ulttyq ǵylym jáne tehnologııalar ýnıversıtetimen seriktestik týraly kelisimge qol qoıdyq. Budan bólek, úlken baǵdarlamany iske qosamyz. Bul shamamen 1 mlrd teńgege teń. Ońtústik Koreıa parlamenti atalǵan bastamany birlesip qarjylandyrýdy maquldady. Sondaı-aq qarasha aıynda Gonkong qalalyq ýnıversıteti men Sátbaev ýnıversıteti arasynda ekinshi jasandy ıntellekt mektebin qurý týraly kelisimge qol qoıylady. Biz úshin joǵary oqý ornynyń árbir stýdentiniń sıfrlyq saýattylyqtan basqa jasandy ıntellekt salasynda saýattylyqqa ıe bolýy óte mańyzdy. Sondyqtan Google-men birge arnaıy kýrs jasadyq. Bıyl ony professorlyq-oqytýshylyq quramdy daıarlaýdyń jaqsy standarttary bar 14 ýnıversıtette (jeteýi – jekemenshik, jeteýi – memlekettik) paıdalanamyz. Kelesi jyldan bastap qanatqaqty jobanyń nátıjeleri boıynsha bul kýrsty barlyq ýnıversıtet stýdenti úshin mindetti etemiz, – dedi Saıasat Nurbek.
Eń iri IT forýmda elimizdiń teńdessiz sıfrlyq áleýeti týraly aıtylǵanymen, eldi ınternetpen qamtamasyz etý máselesi áli de ózekti. Keıbir mektepterde áli kúnge deıin ınternet múlde joq nemese ınternet jyldamdyǵy talapqa saı emes. Baǵdat Mýsın buǵan qatysty da mańyzdy málimdeme jasady.
– Bulaı bolǵany úshin keshirińizder, keıde biz óz máselelerimizdi ózimiz sheshe alamyz dep sengimiz keledi. Biraq SpaceX sııaqty damyǵan tehnologııalar bar kezde olardy paıdalanbaý orynsyz bolar. О́tken aıda Loren Dreıer prezıdentpen kezdesti, nátıjesinde biz 10 mektepti ınternetke qostyq jáne qazan aıynyń sońyna deıin taǵy 2000 mektepti qosý jóninde kelisimshartqa qol qoıamyz. Jarty jyl ishinde oqýshylar sıfrlyq ıgilikterdi erkin paıdalanyp ınternetke qosyla alady. Kelisimshartty aıaqtaýǵa jáne qol qoıýǵa eki apta ketti, eki aptadan keıin tolyq aqparatty aıtamyn. Bul Úkimettiń qarjysy, sondyqtan qyzmetterdiń quny týraly barlyq málimetti mindetti túrde jetkizemiz, – dedi B.Mýsın.
Odan bólek, Prezıdent Qasym-Jomart Toqaev forýmda 5G ınternetti ornatýdy merziminen buryn aıaqtaýdy tapsyrǵan edi. B.Mýsınniń aıtýynsha, 2025 jyldyń sońyna deıin elimizdiń iri qalalarynyń jartysynan kóbi 5G-ge qosylady. Jospar boıynsha bıyl 700 bazalyq stansa ornatylýy qajet. Jyl sońyna deıin bul kórsetkish 1 myńǵa jetedi.