Senat tóraǵasy Máýlen Áshimbaev Digital Nomads qaýymdastyǵynyń ókilderimen kezdesti. Bul – shetelde turatyn jáne álemniń jetekshi tehnologııalyq kompanııalarynda jumys isteıtin azamattarymyzdy biriktiretin joba. Olar qazir elordamyzda ótip jatqan Digital Bridge halyqaralyq tehnologııalyq forýmyna qatysý úshin Astanaǵa arnaıy kelgen.
Palata spıkeri sońǵy jyldary Digital Bridge forýmy aıtarlyqtaı keńeıip, IT-ındýstrııany damytý salasynda tanymal jáne bedeldi alańǵa aınalǵanyn aıtty. Bıyl atalǵan Forýmǵa 20 myńnan astam adam qatysyp jatyr. Olardyń qatarynda 300-den astam IT-kompanııanyń ókilderi men 30 elden kelgen delegasııa músheleri bar.
Senat tóraǵasy elimizde IT salasyna joǵary deńgeıde basa mán berilip kele jatqanyn tilge tıek etti. Elimiz elektrondy Úkimet pen fıntehti damytý ındeksi boıynsha álemdik kóshbasshylar qatarynda ekenin jetkizdi.
«Memleket basshysy taıaýda jarııalaǵan Joldaýynda IT salasyna erekshe kóńil bóldi. Prezıdentimiz 2026 jylǵa qaraı IT qyzmetteriniń eksportyn bir mıllıard dollarǵa jetkizý jóninde strategııalyq mindet júktedi. Osyǵan baılanysty Parlamenttiń aldynda atalǵan tapsyrmanyń oryndalýyn qajetti quqyqtyq bazamen qamtamasyz etý mindeti tur. Elimizdegi qazir qoldanystaǵy jáne qalyptasyp jatqan quqyqtyq jaǵdaı halyqaralyq kompanııalardyń bizdiń naryqqa kelýin yntalandyrýy kerek. Sondaı-aq qazaqstandyq IT-kompanııalardyń damýyna yqpal etýge tıis», – dedi Máýlen Áshimbaev.
Kezdesý barysynda Qazaqstanda IT-salany qoǵamnyń suranystary men jahandyq trendterdi eskere otyryp damytýdyń keleshegi talqylandy. Jasandy ıntellekttiń damýyna qatysty syn-qaterler de nazardan tys qalǵan joq. Sonymen qatar is-sharada jastar óz tájirıbelerimen bólisip, salanyń sapasyn arttyrýǵa arnalǵan jobalardy iske asyrý jónindegi usynystaryn ortaǵa saldy.