Sońǵy jyldary qarqyndy damyp kele jatqan jasandy ıntellekt múmkindikteri, sonyń ishinde qylqalam óneri, shyǵarmashylyq ındýstrııa ortasynda alańdaýshylyq týǵyzyp otyr. Qazir neırojeliler kórkem shyǵarmalardy jasaýdyń jańa quraly retinde belsendi qoldanylady, oǵan stýdentter de bildeı sala ıeleri de mashyqtanyp alǵan. Sebebi ol arnaıy bilim berýdi qajet etpeıdi, óner salasynda taza tehnıkalyq daǵdylarǵa ıe bolý qajettiliginen de aryltady.
Máselen, 2022 jyly Amerıkanyń Kolorado shtatynda ótken óner baıqaýynda «Sıfrlyq óner» sanatynda jasandy ıntellekt múmkindigin paıdalanǵan qatysýshy jeńiske jetti, al belgili Cosmopolitan jýrnaly arlǵash ret óz muqabasyn DALL-E 2 baǵdarlamasy arqyly jasap shyǵarǵan.
Osy tusta daryny arqyly nan tabatyn óner adamdarynyń alańdaýshylyǵy da óte oryndy. Jasandy ıntellekt baǵdarlamalaryn jetildirý aıasynda adamnyń múmkindikterinen asyp túsetin daǵdy paıda bolmaıtynyna kim kepil? Alaıda, neırojelilik baǵdarlamalardyń kemshiligi de bar - onyń sýretshi sııaqty jeke tájirıbesi men tereń ınterpretasııasy bolýy múmkin emes. Jasandy ıntellekt synı turǵydan oılaýǵa qabiletsiz: ol tek ashyq kózderde ornalastyrylǵan vızýaldy aqparat aǵynyn taldaýsyz tutynady.
Jasandy ıntellekt jasaǵan sýretter - ónerden týǵan tyń týyndy emes, tek kompıýterde jasalǵan sýretter, sáıkesinshe AI qyzmetterin paıdalanatyn qoldanýshylardy sýretshi dep ataý qate bolar. Sebebi keskindi adam emes, mashına jasaıdy – demek, prosess is júzinde shyǵarmashylyqqa jatpaıdy. О́ner adamdary progress usynatyn múmkindikterdiń utymdy tustaryn keregine jaratsa quba qup.
Búginde Open AI «kómegin» marketolog mamandar da qarqyndy paıdalanyp jatyr. Máselen, otandyq avtomobıl óndirýshi Allur kompanııasy jarnama agenttigimen birlesip, Ortalyq Azııadaǵy neırondyq jeliler arqyly jasalǵan alǵashqy beınerolıkti usyndy. Aıta ketsek, Qazaqstandaǵy bızneste mundaı biregeı yntymaqtastyq alǵash ret jasalyp otyr.
«Bul ıdeıa kórermenge kólikterdiń tek tasymaldaý quraly emes ekenin túsindiredi. Biz kópshilikke jańa tehnıkanyń erekshe sezim syılaıtynyn, alǵa umtyldyratynyn, jańa bastamalarǵa jeteleıtinin kórsetkimiz keldi», deıdi kompanııanyń shyǵarmashylyq dırektory.
Aıta ketsek, jaqynda Almatyda zamanaýı ınnovasııalyq ozyq kórme ashyldy. Qazaqstan Respýblıkasynyń Memlekettik Ortalyq mýzeıiniń ókilderi Plan B jáne FARBA (Mınsk, Belarýs) galereıalaryndaǵy áriptesterimen birlesip «Jasandy ıntellekt: sýretshi nemese mashına?» atty kórme usyndy.
Nazarǵa usynylǵan jumystardyń barlyǵyn jasandy ıntellekt jasap shyǵarǵan. Kórmege tabıǵat, mıfologııa, tarıh, arhıtektýra jáne basqa da salalardy qamtıtyn 10 túrli sanatqa bólingen 120-dan astam sýret qoıylǵan.
О́tken aptada elordada ótken «Digital Bridge» is-sharasynda Prezıdent Qasym-Jomart Toqaev ta jasandy ıntellekt máselesine toqtaldy. Buryn fantastıkalyq shyǵarmalarda, kınoda ǵana kezdesetin dúnıeler ómir aqıqatyna aınaldy. Prezıdenttiń pikirinshe, ony elemegender kósh sońynda qalyp qoıýy múmkin.
Kez kelgen tehnologııalyq progrestiń oń jáne teris jaǵy bar. Sondyqtan da paıdasy men zııany jóninde, artyqshylyǵy men qaýipi týrasynda pikir kóp. Qatelik jasandy ıntellektte de, adamda da bolady. Ásirese qıyn tapsyrmalardy oryndaý maqsatynda jasandy ıntellektti paıdalaný – adam qatelikterine jol bermeıdi. Biraq asa qymbat tehnıka shyǵarmashylyq ónerdi almastyra almaıdy, bul adamı emosııany túbegeıli joıyp, týyndyǵa jan bitirmeıdi.