Qazirgi geosaıası jaǵdaı ýshyǵyp turǵanda eline qorǵan bolar jastardy tárbıeleý mańyzdy. Osy rette Jetisýda túrli is-shara uıymdastyrylyp jatyr. Tipti, Ekinshi dúnıejizilik soǵysta qaza tapqan jaýyngerlerdi týǵan jerine jerleý rásimi de qolǵa alynyp otyr. Osy rette Jetisý oblysy qorǵanys isteri jónindegi Departamentiniń bastyǵy podpolkovnık Medet Týrskeldıevpen áńgimelesken edik.
- Bárine belgili bir jaıt, áskerge shaqyrý jylyna eki-aq ret keledi. Birinshisi kóktemde, ekinshisi kúz mezgilinde. Aldymen osy áskerge shaqyrý jumys barysyn aıtyp ótseńiz.
– Qazirgi tańda Jetisý oblysyna qarasty aýdan, qalalarda shaqyrylýshylardy Otan aldyndaǵy boryshtaryn atqarýǵa saltanatty túrde áskerge shyǵaryp salý jumystary qarqyndy júrgizilip jatyr. Qazaqstan Prezıdenti - Qarýly Kúshterdiń Joǵarǵy Bas qolbasshysy óskeleń jastarǵa eń senimdi tiregine úlken úmitin artady. Senimdi aqtaý azamattyq paryz. Azamattardy merzimdi áskerı qyzmetke shaqyrý Qazaqstan Respýblıkasy «Áskerı qyzmet jáne áskerı qyzmetshilerdiń mártebesi týraly» Zańynyń 31-babyna sáıkes Qazaqstan Respýblıkasy Prezıdentiniń Jarlyǵy jáne Qazaqstan Respýblıkasy Úkimetiniń qaýlysy negizinde jylyna eki ret júrgiziledi. On segiz jastan jıyrma jeti jasqa deıingi, áskerge shaqyrýdy keıinge qaldyrýǵa nemese áskerge shaqyrylýdan bosatylýǵa quqyǵy joq azamattar Qarýly Kúshteri, basqa da áskerler men áskerı qurylymdardy jasaqtaý úshin qajetti sanynda merzimdi áskerı qyzmetke shaqyrylýǵa jatady. Bir baıqaǵanym, Jetisýda áskerge barýǵa asyq jastar kóp.
– Jastardy Otan aldyndaǵy paryzyn óteý mindeti týraly bilim berý ordalarynda qandaı is-sharalar júrgiziledi?
– Otan aldyndaǵy paryzyn óteý mindeti týraly bilim ordalarynda qorǵanys isteri jónindegi Departamentimen, áskerı bólimderdiń áskerı qyzmetshileri jáne Qarýly kúshter ardagerleri túsindirme jumystarymen qatar erlik sabaqtaryn uıymdastyryp ótkizip keledi. Sonymen qatar áskerı bólimderde oqýshylar men stýdentterge ashyq esik kúnderi ótip otyr. Áskerı bólimderde ótkiziletin ashyq esikter ol jasóspirimderge bolashaqta Otan aldyndaǵy boryshyn óteý jolyndaǵy alǵashqy baspaldaq dep aıtýǵa bolady. Áskerı bólimge saıahatqa barýdyń taǵylymy, tárbıelik máni, patrıottyq mazmuny tereńde jatyr. Mundaı ashyq esik kúnder bolashaq Otan qorǵaýshylardyń tárbıesine tıgizer úlesi zor, óıtkeni olardyń Otandy qurmetteýge, qorǵaýǵa degen sezimderi arta túsetini sózsiz. 2023 oqý jylynda Qarýly Kúshterdegi jaýyngerlik saıystyń urany «Qýatty armııa - Jańa Qazaqstan!» bolǵanyn aıta keteıin.
– Sondaı-aq zapastaǵy ofıserlerdi áskerı qyzmetke shaqyrý týraly ne aıtasyz?
- Zapastaǵy ofıserlerdi áskerı qyzmetke shaqyrý Qazaqstan Respýblıkasy Úkimetiniń 2023 jyldyń 26 qańtaryndaǵy №49 Qaýlysynyń negizinde júrgiziledi. Zapastaǵy ofıserlerdi áskerı qyzmetke shaqyrý ol áskerı qyzmetke jaramdy, jıyrma toǵyz jasqa deıingi zapastaǵy ofıserler men otyz eki jasqa deıingi medısınalyq qyzmettiń zapastaǵy ofıserleri ýákiletti organdardyń ótinimderi boıynsha Qazaqstan Respýblıkasy Úkimetiniń qaýlysy negizinde beıbit ýaqytta ofıserler quramynyń laýazymdarynda áskerı qyzmet ótkerý úshin áskerge shaqyrylady.
– Bıyl tamyz aıynda Ekinshi dúnıejúzilik soǵysta qaza tapqan sarbazdyń súıegi týǵan jerinde qaıta jerlendi dep estidik...
- Iá, Ekinshi dúnıejúzilik soǵysta qaza taýyp habarsyz ketken otandyq jaýyngerdi qaıta jerleý saltanatty rásimi Alakól aýdany, Qabanbaı aýylynda ótti. Saltanatty rásimge ákimdik, ardagerler, áskerıler jáne aýyl turǵyndary qatysty.
Qazaqstan Respýblıkasy Qorǵanys mınıstrligi men «Atamnyn Amanaty» qoǵamdyq birlestigi - Ekinshi dúnıejúzilik soǵysta habarsyz ketken jaýyngerlerdiń jerlengen oryndaryn anyqtaý, olardyń esimderin máńgi este qaldyrý maqsatynda Máskeý qalasyndaǵy Rjev túbegindegi Komarıha ormanynda júıeli izdestirý, muraǵattyq zertteý jumystaryn júrgizý barysynda burynǵy Almaty oblysy, Andreev aýdandyq áskerı komıssarıatynan attanǵan, Jetisý oblysynyń (buryńǵy Almaty oblysy) týmasy, jaýynger Parasenko Fılıp Lavrentevıchtiń súıegi men medalony tabylǵan. Ony aımaqtyq «Frontovye dorogı» áskerı-patrıottyq izdeý klýbynyń izdeýshileri izdep tapqan. Jaýynger F.L.Parasenkony pyraǵyn Alakól aýdany, Qabanbaı aýylynda áskerı qurmetpen qaraly mıtıng ótkizildi.
– Jýyrda Qorǵanys mınıstrliginiń aqparattyq-túsindirý toby Jetisý garnızonynda bolyp qaıtty dep estidik. Aqparattyq top ne maqsatpen keldi?
- Qorǵanys mınıstrliginiń aqparattyq-túsindirý toby Jetisý garnızonynda bolyp «Jańa Qazaqstannyń tiregi - aıbyndy jastar» taqyrybynda Ilııas Jansúgirov atyndaǵy mádenıet úıinde mektep oqýshylarymen, kolledj bilimgerlerimen, «Jas sarbaz» áskerı-patrıottyq klýbynyń tárbıelenýshilerimen jáne áskerı kafedra stýdentterimen kezdesý uıymdastyrdy. Atalǵan sharada «Qarýly Kúshter ardagerleri» Jetisý oblysy fılıalynyń tóraǵasy Rahym Qyrǵabaqov, radıoelektronıka jáne baılanys áskerı ınstıtýtynyń áskerı-patrıottyq jáne ıdeologııalyq jumys bóliminiń bastyǵy maıor Mıras Kalıýllın, qurlyq áskerleri áskerı ınstıtýtynyń ıdeologııalyq jáne áskerı-patrıottyq jumys bóliminiń ofıseri maıor Muratbek Qulshaev óskeleń urpaqqa áskerı-patrıottyq saýaldar boıynsha baıandama jasady.
– Áńgimeńizge rahmet. Qyzmetińizge sáttilik tileımiz.