Túrkistan qalasynda túrki elderiniń týrıstik forýmy ótti. Túrki áleminiń týrıstik astanalary arasynda ózara tıimdi yntymaqtastyq ornatý, 2024 jyly túrki áleminiń kelesi astanasy retinde Túrkistan qalasymen tanystyrý maqsatyndaǵy forýmǵa Túrki memleketteri uıymy ókilderi, Túrkistan oblysy men Qoqan qalasynyń ákimi, Týrızm jáne sport mınıstrligi, túrki elderiniń týrızmge qatysty mınıstrlikteri, ortalyq jáne jergilikti memlekettik organdardyń basshylary qatysty.
О́ńirde atqarylyp jatqan aýqymdy jumystarǵa toqtalǵan oblys ákimi Darhan Satybaldy bul is-shara túrkitildes elder arasyndaǵy týrızm baǵytynda qarym-qatynastardy damytýǵa mańyzdy úles qosatynyn atap ótti. Týrısterdi tartý úshin jańa ushaq jáne avtobýs baǵyttarynyń qurylǵanyn aıtty.
«2021 jyly 31 naýryzda Túrkitildes memleketter yntymaqtastyq keńesiniń VIII beıresmı sammıtinde taraptar Túrkistandy túrki áleminiń rýhanı astanasy dep ataý týraly deklarasııaǵa qol qoıdy. Bul qujat – Túrkistannyń rýhanı-mádenı baǵytta damýyna oń serpin berip keledi. Jańa Túrkistan túrki áleminiń mádenı-rýhanı ortalyǵyna aınalady dep senemin», dedi oblys ákimi.
Al TMU joba dırektory Ersın Aıdoǵan Túrkistannyń Túrki áleminiń týrıstik astanasy bolyp tańdalýyn keıingi ýaqytta salynǵan ınvestısııa men damýdyń bir kórinisi retinde qarastyrýǵa bolatynyn atap ótti.
Sondaı-aq forýmda Týrızm jáne sport vıse-mınıstri Erjan Erkinbaev 6 baǵyt qarastyrylǵan bastamalar men keshendi is-sharalardy usyndy. Atap aıtqanda, birinshiden, TMU-ǵa múshe memleketter men baqylaýshy memleketterdiń iri qalalary arasyndaǵy avıareıster sanynyń artýy qajet. Osy arada aıta ketelik, «Samarqand – Túrkistan» baǵytyndaǵy alǵashqy áýe marshrýty iske qosylmaq. О́zbekstandyq «Silk Avia» áýe kompanııasynyń ushaǵy 28 qazan kúni Túrkistandaǵy Halyqaralyq áýejaıǵa alǵashqy reısin jasaýdy josparlap otyr. Jalpy, Túrki- stan áýejaıynan halyqaralyq Ystanbul men El-Kýveıt jáne elimizdiń Astana, Almaty, Aqtaý, Qaraǵandy, Aqtóbe men Oral baǵyttarynda ushaq qatynaıdy. Bıyl qarasha aıynda Túrkistan halyqaralyq áýejaıyna «Wizz Air» kompanııasynyń «AirBus 321» áýe reısi qonady. Bul Túrkistan – Abý-Dabı áýe baǵytynyń alǵashqy reısi bolmaq. Atalǵan baǵyttaǵy reıs aptasyna 3 ret qatynaıdy. Vıse-mınıstrdiń usynystaryna qaıta oralsaq, ekinshiden, birlesken týrıstik ónimderdi qurý, seriktestik qatynastardy jolǵa qoıý boıynsha jumystardy jandandyrý jáne «Jibek joly» zamanaýı týrıstik marshrýtyn damytý mańyzdy. Úshinshiden, Qazaqstan men О́zbekstan arasyndaǵy «Tabbarýk Zıerat» qanatqaqty jobasyn odan ári jalǵastyrý, tórtinshiden, salamatty ómir saltyn nasıhattaý, mádenı almasý jáne týrıstik aǵymdy yntalandyrý maqsatynda TMU elderi arasynda júgirý boıynsha marafondar alıansyn qurý usynyldy. Besinshiden, týrızm jáne qonaqjaılylyq boıynsha oqytýǵa mamandandyrylǵan TMU ýnıversıtetter lıgasyn qurý stýdentterdiń kásibı deńgeıin arttyrýǵa yqpal etedi. Altynshydan, elderdiń týrıstik áleýetin ilgeriletý jáne marketıng boıynsha tájirıbe almasýdy kúsheıtý qajet.
«TMU keńistigindegi mańyzdy bastamalardyń biri «Túrki áleminiń týrıstik astanasy» ekenin erekshe atap ótýge bolady. Bul bastama Uly Jibek joly boıyndaǵy qalalardyń týrıstik áleýetin ashýǵa múmkindik berip, bir-biriniń mádenı jáne dástúrli qundylyqtaryn bilý arqyly barlyq túrki elderi halyqtarynyń tyǵyz baılanysýyna yqpal etedi», dedi vıse-mınıstr.
Forýmǵa qatysýshylar Qoja Ahmet Iаsaýı kesenesine zııarat etip, qalanyń kórikti jerlerin aralady. Sonymen qatar ulttyq taǵamdardan jasalǵan kórmeden kópshilikke dám usynyldy. Oblys ónerpazdary ánnen shashý shashyp, myń buralǵan bıshiler bı bıledi.
Aıta keteıik, TMU elderindegi týrızm máselelerine jaýapty mınıstrlerdiń VIII otyrysy aıasynda Túrkistandy 2024 jylǵa arnalǵan Túrki áleminiń astanasy dep jarııalaý bastamasy maquldanǵan edi.
TÚRKISTAN