Ákimshilik quqyq buzýshylyq úshin ustalǵandardy arnaıy qabyldaý oryndary bar. Jaqynda Atyraýdaǵy osyndaı orynda psıholog kabıneti ashyldy. Maqsat – ishimdikke salynǵan, otbasylyq turmysy tómen adamdarǵa jeke jáne toptyq seans túrinde keńes berý.
Jergilikti polısııa qyzmeti basqarmasy áıelderdi zorlyq-zombylyqtan qorǵaý tobynyń erekshe tapsyrmalar jónindegi aǵa ınspektory, polısııa maıory Raısa Zınelǵabıdenqyzynyń aıtýynsha, elimizde otbasy ınstıtýtynyń bedelin arttyrý, nyǵaıtý maqsatynda júıeli jumystar atqarylyp keledi. Otbasyndaǵy janjaldan bastalyp, zorlyq-zombylyqqa ulasatyn áreketterden zábir kóretinderdiń basym bóligi – áıelder men balalar. Sol sebepten, olarǵa da, zábir kórsetýshilerge de psıhologııalyq keńes qajet.
«Aptasyna úsh ret ákimshilik qamaýda otyrǵan azamattar psıholog-mamanmen jeke kezdesip, suraq qoıa alady. Toptyq seansqa qaraǵanda, jeke keńestiń tıimdirek ekeni baıqalyp otyr. Sebebi psıhologke júginýshilerge arnaıy suraqtarǵa ózge adamdar aldynda ashylý qıynǵa soǵady. Psıholog kabınetine kóp jaǵdaıda er adamdar keledi. Ústinen aryz jazylyp, birneshe kún kamerada otyrǵandarmen, ýaqytsha qamaýdaǵylarmen áńgimelesý óte qıyn. Olar ashylyp sóılespeıdi. Tipti barlyq máselege báribir degen kózqarasy basym. Máselen, qabyldaýǵa kelgen bir adam áıelimen arazdasyp qalǵanyn, endi úıine barmaý úshin ýaqytyn osyndaı orynda ótkizgenin qalaǵan. Otbasylyq qundylyqtar taqyrybynda ótkizilgen toptyq seanstan keıin ol birneshe jyl ishimdikke salynǵanyna, otbasyn baǵalamaǵanyna ókindi», deıdi psıholog Aqmaral Sháripova.
Áıelderdi zorlyq-zombylyqtan qorǵaý tobynyń erekshe tapsyrmalar jónindegi aǵa ınspektory, polısııa maıory Raısa Zınelǵabıdenqyzynyń deregine súıensek, turmystyq zorlyq-zombylyq úshin kináli adamdar Ákimshilik quqyq buzýshylyq týraly kodeksiniń 73-babymen jaýapkershilikke tartylýy múmkin. Eger olardyń áreketinde qylmystyq quqyq buzýshylyq quramy bolsa, Qylmystyq kodeksiniń 106-babymen (Densaýlyqqa qasaqana aýyr zııan keltirý), 107-babymen (Densaýlyqqa aýyrlyǵy ortasha zııan keltirý), 110-babymen (Qınaý), 115-babymen (Qorqytý) qylmystyq jaýapkershilikke tartylady.
«Qazir Atyraý oblystyq polısııa departamentinde áıelder men balalardy turmystyq zorlyq-zombylyqtan qorǵaý maqsatynda 10 aǵa ýchaskelik ınspektor jumys isteıdi. Olar «Turmystyq zorlyq-zombylyqtyń quqyqtyq negizderi jáne onyń aldyn alý máseleleri» taqyrybynda semınar-trenıng ótkizedi. Maqsatymyz – zorlyq-zombylyqtyń, otbasylyq janjaldyń aldyn alý», deıdi Raısa Zınelǵabıdenqyzy.
Atyraý oblysy ákimi apparaty janyndaǵy áıelder isteri jáne otbasylyq-demografııalyq saıasat jónindegi komıssııa hatshysy Zámzágúl Jalmýrzınanyń aıtýynsha, munaıly shaharda 2012 jyly daǵdarys ortalyǵy ashylǵan. Mundaı ortalyqtar Jylyoı jáne Qurmanǵazy aýdanynda bar. Endi Isataı aýdanynda otbasyn qoldaý jáne daǵdarys ortalyǵyn ashý kózdelgen.
«Qıyndyqqa ushyraǵan áıelder men olardyń balalaryna psıhologııalyq, quqyqtyq, medısınalyq kómek kórsetiledi. Jyl basynan ortalyqqa 24 áıel men 63 bala tústi. Qazir olardyń sany azaıyp, 5 ana men 16 balaǵa kómek kórsetilip otyr», dep málim etti turmystyq zorlyq-zombylyqqa ushyraǵan áıelderge kómek kórsetý bólimshesi dırektorynyń orynbasary Aıbarshyn Imanǵalıeva.
Jergilikti polısııa qyzmeti áıelderdi zorlyq-zombylyqtan qorǵaý tobynyń ınspektory, polısııa aǵa leıtenanty Áıgerim Oraqbaevanyń málimetinshe, zábir kórgenderden kúnine 20-25 habar túsedi. Máselen, bıyl alty aıda turmystyq zorlyq-zombylyqqa qatysty 102 arnasyna 4 097 habar túsken. Osyndaı derekke baılanysty Ákimshilik quqyq buzý týraly kodeksiniń 73-babymen (Otbasy-turmystyq qatynastar aıasyndaǵy quqyqqa qarsy áreketter) 1 198 adam jaýapkershilikke tartylǵan. Al 1 365 quqyq buzýshyǵa qorǵaý nusqamasy shyǵarylypty. Onyń ishinde 334 adamǵa erekshe talap qoıylǵan. Qorǵaý nusqamasyn buzǵan 96 adamǵa Ákimshilik quqyq buzýshylyq týraly kodeksiniń 461-babymen ákimshilik jaza berilgen.
Atyraý oblysy