«Qorǵas-Shyǵys qaqpasy» AEA aýmaǵynda ındýstrııalyq park salý jobasy aıasynda «Qytaı-Qazaqstan halyqaralyq ındýstrııalyq qalasy» JShS qurylys jumystaryna kiristi. Kásiporyn 200 gektar aýmaqta qurylystyń alǵashqy kezeńin qolǵa almaq. Onyń ishinde ınjenerlik jeliler júrgizý men magıstraldyq kósheniń qurylystary bar.
Investorlar bıylǵy qarashadan bastap AEA aýmaǵynan tys salynatyn ákimshilik ǵımarattar men qonaqúı nysandarynyń alǵashqy qadasyn qaǵyp, qurylysyn bastaýǵa qulshynys tanytty.
Esterińizge sala keteıik, bul jobanyń basty maqsaty – ındýstrııalyq park salý jáne de «Qorǵas-Shyǵys qaqpasy» AEA-da óndiristik, logıstıkalyq qyzmet kórsetýdi uıymdastyrý, sondaı-aq ónerkásiptik qýattardy QHR-dan Qazaqstan aýmaǵyna aýystyrý. Bul jobalar QHR-dyń «Bir beldeý, bir jol» strategııasyn, ınfraqurylymdy damytýdyń «Nurly jol» memlekettik baǵdarlamasyn jáne «Nurly jol» jańa ekonomıkalyq saıasat pen Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy «Jibek jolynyń ekonomıkalyq beldeýi» atty bastamalaryn negizge alady.
Jobanyń quny – 330 mlrd teńge. Oǵan bólinip otyrǵan jalpy jer kólemi 1000 gektardy quraıdy. Sonyń arqasynda jaqyn eldi meken turǵyndary úshin 2 myńnan astam jumys orny ashylady dep kútiledi.