5 túrli baǵytty qamtyǵan «Sıfrly dáýirdegi jýrnalıstıka: ádister men ınnovasııalar» atty semınar eki kún boıy ótti, dep habarlaıdy Egemen.kz.
Is-sharanyń birinshi kúni telebaǵdarlamalar avtory jáne júrgizýshisi Erbolat Muhamedjan «Telebaǵdarlama jasaý tehnologııasy: ıdeıadan ónimge deıin» taqyrybynda sheberlik saǵatyn ótkizdi. Ol naryqty taldaý, aýdıtorııaǵa ótimdi formattardy anyqtaý, jobanyń tujyrymdamasyn ázirleý jáne ony telearnalarǵa usyný máselesine jiti toqtaldy.
Al sheshendik óner salasynyń sarapshysy Merýert Júnisbek «Sheshendik óner. Sóıleý tehnıkasy» ýorkshobynda qatysýshylarmen birge praktıkalyq tapsyrmalar oryndady. Spıker kópshilik aldynda senimdi sóılep, aýdıtorııanyń nazaryn qalaı aýdarý keregin aıtty.
Semınardyń alǵashqy kúnin medıamenedjer, jýrnalıst Álııa Tekenova «Faktchekıng tehnologııalary: quraldar men ádister» atty ýorkshobymen qorytyndylady. Sarapshy sheteldik BAQ-tardyń jalǵan aqparatpen kúres tájirıbesine toqtalyp, faktchektiń negizgi 4 mindetin atady.
Al semınardyń ekinshi kúni PR menedjer Aıbar Oljaev «Daǵdarys jaǵdaılarynda aqparat alýdyń zamanaýı ádisteri» ýorkshobynda daǵdarysqa deıin jáne keıin sheshý kerek máseleler týraly aıtyp, mamandardyń áreketterin mysalmen jiktep kórsetti. Onyń aıtýynsha, naryqta daǵdarys jaǵdaıyn basynan ótkergen nemese daǵdarystyń ishinde júrgen mamandar joǵary baǵalanady.
Semınardyń sońǵy ýorkshobyn podkaster Eldar Qudaıbergen ótkizdi. Ol jasandy ıntellekt tehnologııalaryn medıada qoldaný joldary týraly aıtyp, jýrnalıst jumysyn jeńildetýge JI-diń qandaı kómegi bar ekenine toqtaldy. Spıkerdiń aıtýynsha, jasandy ıntellektiniń kómegimen sport jáne qarjy salasyna qatysty sandyq derekter men statıstıkalardy taldaýǵa bolady.
«Qazaq tili burynǵydaı tehnologııadan alshaq til emes. Sondyqtan jasandy ıntellektini qoldanbasaq ta, mindetti túrde meńgerýimiz kerek. Buryn jýrnalısterden ýaqyt pen kúsh talap etken jumystardy qazir zamanaýı quraldar ońaı oryndap bere salady», dedi spıker.
Is-shara sońynda qatysýshylar ózara suraq-jaýap formatynda tájirıbe almasty. Olarǵa arnaıy sertıfıkattar tabystaldy.
Aıta ketsek, semınardyń maqsaty - aqparatpen jumys isteýde zamanaýı tehnologııalar men ınnovasııalardy tıimdi paıdalaný erekshelikterin úıretý arqyly jýrnalısterdiń biligin arttyrý.
Is-sharany QR Mádenıet jáne aqparat mınıstrliginiń qoldaýymen Qazaqstandyq qoǵamdyq damý ınstıtýtynyń MediaLab ortalyǵy MAQSUT NARIKBAYEV UNIVERSITY-timen birlese ótkizdi.