Búginde elimizde buqaralyq sportty damytýǵa erekshe kóńil bólinip jatyr. Bul baǵytta elordalyq sport mektepteriniń atqaryp jatqan jumysy orasan. Sonyń biri №9 Balalar men jasóspirimder sport mektebinde 9 olımpıadalyq sport túri boıynsha daıyndyq júrgiziledi.
Qazirgi ýaqytta atalǵan mektepte jeńil atletıka, ústel tennısi, semserlesý, bessaıys, trıatlon, badmınton, oq atý, stend atý, sadaq atý sııaqty olımpıadalyq sport túrlerinen oqýshylardy 42 pedagog jattyqtyrady.
«Pedagogterdiń ishinde joǵary, birinshi, ekinshi biliktilik sanattarynyń jattyqtyrýshylary jumys isteıdi. Ekeýi Qazaqstannyń eńbek sińirgen jattyqtyrýshysy qurmetti ataǵyna ıe. Olar – Semserlesý boıynsha jattyqtyrýshy Andreı Chýrbakov jáne oq atýdan jattyqtyrýshy Galına Korchma. Sondaı-aq oq atýdan bir jattyqtyrýshy Olga Dovgýn – Qazaqstannyń eńbek sińirgen sport sheberi», dedi №9 Balalar men jasóspirimder sport mektebiniń dırektory Aıdyn Toqbaev.
Sport mektebinde 693 sportshy bar. Olardyń úsheýi – halyqaralyq dárejedegi sport sheberi, segizi – sport sheberi, 50-i – sport sheberine úmitker, 130-y – sport sheberi ataǵyna ıe.
Sport mektebiniń órenderi respýblıkalyq jáne halyqaralyq resmı básekelerde joǵary nátıjeler kórsetip júr. Aıtalyq, Adel Sadaqbaeva Marokkoda stendtik atýdan Álem kýbogynda komanda quramynda birinshi oryndy ıelendi. Ol dál osyndaı nátıjeni Azııa kýbogynda skıt sanatynda kórsetti.
Aleksandra Fedotova kadetter men jasóspirimder arasyndaǵy semserlesýden Azııa chempıonatynda komandada birinshi, jeke týrnırde ekinshi oryn aldy. Qazirgi bessaıystan Azııa chempıonatyndaǵy júldeli oryndardy Devıd Shaýlskıı men Valerııa Dýdchenko jeńip aldy.
Tashkentte ótken jeńil atletıkadan Azııa chempıonatynda Anastasııa Koloda altyn, Ekaterına Koloda kúmis medal jeńip aldy.
Jospar boıynsha 2023 jyly osy mekteptiń sportshylary 475 jarysqa qatysady. 9 aıda 58 jarys ótkizildi. Sport mektebiniń tárbıelenýshileri 255 medal jeńip aldy.