Astanada №6 mamandandyrylǵan órt sóndirý bóliminiń aýmaǵynda erlikpen qaza tapqan órt sóndirýshi Asqar Zabıkýlınniń qurmetine eskertkish ashyldy, dep habarlaıdy Egemen.kz qalalyq TJD baspasóz qyzmetine silteme jasap.
Eskertkishtiń ashylý saltanatyna jáne № 6 mamandandyrylǵan órt sóndirý bólimine Asqar Zabıkýlınniń esimin berý rásimine Qazaqstan Respýblıkasynyń Tótenshe jaǵdaılar mınıstri Syrym Sháriphanov, elorda ákimi Jeńis Qasymbek, garnızon basshylyǵy men jeke quramy, azamattyq qorǵaý organdarynyń ardagerleri, Asqardyń týystary men jaqyndary qatysty.
«Árbir adamnyń ómiri baǵa jetpes qundy, memlekettiń strategııasy eń aldymen azamattardy qorǵaýǵa, tótenshe jaǵdaılardyń aldyn alýǵa jáne joıýǵa baǵyttalǵan. Sol sebepti qutqarýshylar men órt sóndirýshilerdiń eńbegi asa mańyzdy sanalady. Bul eskertkish – Asqardyń ójettigin, janqııarlyǵy men adaldyǵyn bildiredi. Onyń erligi bizge kúsh pen qýat beretin úlgi bolsyn. Asqar Zabıkýlın bizdiń áriptesimiz ǵana emes, súıikti ul, jar jáne áke boldy, onyń ómirden ótýi bizdiń júregimizge jazylmas jara saldy. Biz ony árqashan eńbekqor, aqyldy jáne súıispenshilikke toly adam retinde este saqtaımyz», dep atap ótti Syrym Sháriphanov óz sózinde.
Is-sharaǵa jınalǵandar memorıalǵa gúl shoqtaryn qoıyp, Asqardy bir mınýt únsizdikpen eske aldy.
Bıiktigi úsh metr bolatyn eskertkishte Asqardyń bıýsti qoladan, al tómengi bóligi mármárdan jasalǵan.
Elordalyq órt sóndirýshi Asqar Zabıkýlın 2022 jylǵy 20 qarashada turǵyn úı keshenindegi órtti sóndirý barysynda qyzmettik boryshyn óteý kezinde qaza tapty, ol óz ómirin qaterge tigip, úsh adamnyń ómirin saqtap qaldy. Prezıdenttiń Jarlyǵymen Asqar qaıtys bolǵannan keıin I dárejeli «Aıbyn» memlekettik nagradasymen marapattaldy.