2-4 qarasha kúnderi elordadaǵy «Barys Arena» sport kesheninde mánerlep syrǵanaýdan 2014 jylǵy Sochı Olımpıadasynyń qola júldegeri, 2011 jylǵy qysqy Azııa oıyndary men 2017 jylǵy Ýnıversıadanyń jeńimpazy, elimizdiń dańqty mánerlep syrǵanaýshysy Denıs Tendi eske alýǵa arnalǵan halyqaralyq «Denis Ten Memorial Challenge» týrnıri ótedi.
Sportty damytý dıreksııasynyń baspasóz qyzmetiniń málimeti boıynsha, Halyqaralyq konkıshiler odaǵynyń (ISU) «Chellendjer» sanatyna enetin Denıs Tendi eske alýǵa arnalǵan bıylǵy jarysqa jer-jahannyń 25 elinen keletin 130-dan asa daryndy sportshy qatysady dep josparlanyp otyr. Atap aıtqanda, olardyń qatarynda keıingi jyly halyqaralyq jarystarda táýir nátıje kórsetip júrgen otandasymyz, el birinshiliginiń birneshe dúrkin chempıony Dıas Jırenbaev, 2017 jylǵy Eýropa jastar Olımpıadasynyń qola júldegeri jáne 2020 jylǵy jasóspirimder arasyndaǵy álem chempıonatynyń qatysýshysy grýzııalyq Nıka Egadze, 2021 jylǵy «CS Warsaw Cup» týrnıriniń chempıondary – Dıana Devıs pen Gleb Smolkın (Grýzııa), estonııalyq talantty sportshy Arlet Levandı jáne taǵy basqa mánerlep syrǵanaýshylar bar. Sonymen qatar bul dodada dańqty jattyqtyrýshy Eterı Týtberıdzeniń Nıkolaı Morozov, Rostıslav Sınısyn jáne Marına Zýeva sııaqty shákirtteri de óner kórsetedi.
Týrnır erejesi boıynsha sportshylar ózara jekeleı syn (erler, áıelder) men muzda bıleý saıystarynan úzdikterdi anyqtap, ISU reıtınginde jaǵdaılaryn jaqsartý úshin qajetti upaılaryn jınaýǵa tyrysady. Sonymen qatar júldegerler uıymdastyrýshylar tarapynan qarjylaı syıaqyǵa da ıe bolady.
Jarys baǵdarlamasy boıynsha, týrnırdiń sońǵy kúninde mánerlep syrǵanaý sportynyń jankúıerleri álemdik deńgeıdegi sportshylardyń qatysýymen Denıs Tenniń týǵanyna 30 jyl tolýyna oraı úlken gala-shoýdyń kýási bolady. Bul keshte 2003 jylǵy álem chempıony, tórt qurlyq birinshiliginiń úsh dúrkin jeńimpazy kanadalyq She-Lınn Býrn, birneshe mańyzdy týrnırdiń júldegeri fransııalyq Marı-Per Lere jáne Denıs Ten akademııasynyń talantty túlekteri de óz ónerlerin ortaǵa salady.
Bıyl tórtinshi márte ótkeli jatqan Denıs Tendi eske túsirýge arnalǵan ISU baǵdarlamasyna engen halyqaralyq týrnır 2019 jyldan beri elimizde dástúrli túrde ótkizilip keledi. Bul saıystyń tusaýy alǵash ret Denıs týyp-ósken Almaty qalasynda kesilse, keıingi jarys 2021 jyly Astanada uıymdastyryldy. Al byltyrǵy týrnırdi Almaty qalasy qaıta qabyldaǵan edi. Jarysty uıymdastyrýshylar bıylǵy básekeni Astanada ótkizýdi jón sanaǵan eken.
Byltyrǵy Almatyda ótken dodada ulttyq qurama sportshylarynan jekeleı synda Dıas Jırenbaev qysqa jáne erkin baǵdarlamany qosqanda tek grýzııalyq Nıka Egadzege ese jiberip, ekinshi orynǵa taban tiregen edi. Al áıelder arasynda koreıalyq Mınche Kım eshkimge des bermese, qyzdar saıysynda 16 jastaǵy otandasymyz Anna Levkoves te jalpy esepte ekinshi orynǵa turaqtap, týrnırdiń kúmis júldegeri atanǵan.
Osy oraıda Denıs Ten «ISU Challenger» serııasyndaǵy týrnırlerde 3 márte jeńiske jetkenin aıta ketken jón. Dańqty jerlesimiz 2009, 2014 jáne 2015 jyldary Horvatııada ótken «Zlatna pirueta Zagreba» (Golden Spin of Zagreb) týrnırinde bas júldeni jeńip alǵan edi.
«ISU Challenger Series» týrnırleri 2014 jyldan bastap qyrkúıek pen jeltoqsan aılary aralyǵynda ótkiziledi. Bir aıta keterligi, Halyqaralyq konkıshiler odaǵy (ISU) jyl saıyn «Chellendjer» sanatyndaǵy jarystar tizimin qaıta bekitip otyrady.