Naǵyz qutqarýshy júretin soqpaqqa túsý úshin tek jalań kúsh pen kózsiz batyr bolý azdyq etedi. Shyn qutqarýshynyń medısına men psıhologııa salasynan da habary bolý kerek. О́ıtkeni kúndelikti qyzmet barysynda adamdarǵa alǵashqy dárigerlik, psıhologııalyq kómek kórsetýge, bıikke órmelep, qyp-qyzyl shoqtyń kózine qoıyp ketýge, aq borannyń astynan adaspaı jol taýyp, adam ómirin arashalaýǵa, keıde muz astyna súńgýge týra keledi.
Oblystyq Tótenshe jaǵdaı departamentine qarasty №21 órt sóndirý beketiniń bólimshe komandıri Aıdos Boranbaevtyń boıynda naǵyz kásibı qutqarýshyǵa tán san taraý daǵdy-biliktiń bári bite qaınasyp jatyr. Quryshtaı shymyr deneli, orta boıly, oıly kózdi, kóp sózge joq aǵa serjant ótken jyly Áýlıekól aýdanynda bolǵan alapat órt kezinde kórsetken janqııarlyǵy úshin Prezıdent jarlyǵymen «Erligi úshin» medalimen marapattalǵan. Aıdos qutqarýshylar sapynda ormanda órt tutanǵan kúnnen bastap sońǵy shoq sóngenshe arpalysty.
– Jyldamdyǵy sekýndyna 20 metrge deıin jetetin kúshti jeldiń saldarynan tilsiz jaý tez órship, búkil orman qyzyl jalynǵa orandy. Eldi mekenderge qaýip tóne bastady. Bizdiń jasaq, eń aldymen, qaýipti aımaqtaǵy adamdardy evakýasııalady. Tilsiz jaýdyń eldi mekenderdegi turǵyn úılerge ótip ketýine jol bermeý úshin jantalastyq. Amanqaraǵaıdaǵy munaı bazasynyń aýmaǵyna sý shashyp, zardaby aýyr jarylysty boldyrmadyq. Munaı bazasyndaǵy alyp sısternalar jarylsa, onyń arty orny tolmas qaıǵy-qasiretke, úlken apatqa ákep soǵatyn edi. Jarylys tolqyny Amanqaraǵaıdan asyp, bir sheti Novonejındi, ekinshi sheti Áýlıekóldi sharpýy múmkin. Bul eki ortada qanshama úı, qanshama adam, qansha mal, qansha múlik bar. Ony oılaýdyń ózi qorqynyshty. Jantalasyp júrip tónip turǵan orasan qaýiptiń betin qaıtardyq. Bólimshe quramyndaǵy jigitter kezek-kezek 1-2 saǵattaı uıyqtap alyp, alty kún boıy arpalystyq, – deıdi aǵa serjant.
Jalpy aýmaǵy 43 myń gektardy sharpyǵan tilsiz jaý besinshi kún degende birjola tizgindelgen. Alaıda A.Boranbaevtyń bólimshesi Qostanaı, Aqmola oblystarynyń kúsh-quraldary sapynda ormannyń ár jerinde shala janǵan qolamta shoqty sóndirý, órttiń saldaryn joıý jumystaryn atqardy. Amanqaraǵaı, Lesnoe, Ozernoe jáne Baǵanaly aýyldarynyń aýmaqtarynda órtke qarsy qaraýyl qyzmetinde turdy.
Bútin eldi alańdatyp, kóptiń qabyrǵasyn qaıystyrǵan alapat órtti sóndirýge TJM, IIM UU-nyń, Qostanaı qalasyndaǵy IIM akademııasynyń, Qorǵanys mınıstrliginiń, JAO jáne oblystyń kommýnaldyq qyzmetteriniń kúsh-quraldary – barlyǵy 207 tehnıka, 5 órt sóndirý poıyzy, 1 785 adam qatysqan.
Amanqaraǵaı órt sóndirý beketiniń basshysy Abzal Jumadilovtiń aıtýynsha, bólimshe komandıri A.Boranbaev – kópshil, kishipeıil ári ózine júktelgen kez kelgen mindetti asa joǵary jaýapkershilikpen atqaratyn naǵyz kásibı qutqarýshy. Abzal tek Amanqaraǵaıdaǵy alapat órtte ǵana emes, oǵan deıingi, odan keıingi talaı-talaı tosyn apat, qıyn-qystaýda ózin shuǵyl sheshim qabyldaı alatyn, qaýiptiń aldyn kórip, baǵytyn boljaı biletin komandır retinde kórsete bildi. Qazir bólimshesinde ózin qosqanda bes qutqarýshy bar. Taıaýda ǵana sý jańa órt sóndirý kóligin aldy. Beseýi bes saýsaqtaı jumylyp, talaı adamdy ajal aýzynan arashalap qalyp júr.
– Aıdostyń janyndaǵy jigitter de osal emes. Mysaly, byltyr Áýlıekól mańynda aýyr jol apaty bolyp, A.Boranbaevtyń bólimshesi jeńil kóliktiń ishinde qansyrap jatqan adamdy alyp shyǵyp, aman alyp qaldy. Ol kisiniń júregi toqtap qalǵan eken. Bizdiń jigitter ókpege jasandy dem jiberý arqyly qaıta tiriltip aldy. Keıin dárigerler bizdiń órt sóndirý beketine rızashylyq bildirip, eger sizder durys alǵashqy medısınalyq kómek kórsete almaǵan jaǵdaıda es-tússiz jatqan adamnyń tiri qalý-qalmaýy ekitalaı bolar edi degen áńgime aıtty, – deıdi A.Jumadilov.
Byltyr Amanqaraǵaı aýylynda qalyń qamys janyp, mańaıdaǵy turǵyn úı, qora-jaılarǵa qaýip tóngende de órt shyqqan jerge Aıdostyń bólimshesi birinshi bolyp jetti. Tilsiz jaýdyń tegeýrinin dál boljaǵan qutqarýshy der kezinde qosymsha kúsh shaqyryp, ózi órt sóndirýge kirisip ketti. Nátıjesinde, qysqa ýaqyt ishinde tilsiz jaý aýyzdyqtalyp, órt sóndirýshiler eldiń alǵysyna bólengen.
– Mundaı oqıǵalardy aıta bersek taýsylmaıdy. Bul endi bizdiń kúndelikti jumysymyz, atqaratyn mindetimiz ǵoı. О́z basym erlik jasadym dep emes, qyzmettik mindetimdi atqardym dep oılaımyn, – deıdi besaspap qutqarýshy.
Qostanaı oblysy