El kóńilin shattyqqa bólegen shyraıly mereke – Respýblıka kúni qarsańynda oblys ortalyǵynda áleýmettik jaǵynan az qamtamasyz etilgen 65 adam jańa páterdiń kiltin alyp, aq túıeniń qarny jarylǵan súıinishti oqıǵa boldy.
Jınalǵan jurt arqa-jarqa. Bir-birin etene tanyp-bilmese de, qýanysh ortaq bolǵan soń kópten kútken shyn mánindegi shattyqqa qutty bolsyn aıtysyp jatyr. «Sabaqty ıne sátimen» degendeı, máni mol merekemen oraılasqan qýanyshqa jınalǵan aq jaýlyqty ájeler aqjarylqap sátte shashý shashyp, kóp kóńilin demedi. Saltanatty rásimge páterge ıe bolǵandarmen birge tilektes, nıettes etjaqyn týys ta jınalǵan. Demek, baqytty sátti basynan keshirip jatqandar 65 adam ǵana emes, dúıim kópshilik deýge de bolady.
13 páterdi jetim balalar men ata-analarynyń qamqorlyǵynsyz qalǵandar ıelense, 15 páter kópbalaly otbasylarǵa berilip otyr. Halyqtyń áleýmettik jaǵynan az qamtylǵan tobyna 24 páter buıyrsa, 13 páterdi memlekettik qyzmetshiler men bıýdjettik uıymdardyń ókilderi jáne áskerı qyzmetshiler aldy. Jańa páterlerdiń kiltin Kókshetaý qalasynyń ákimi Baýyrjan Ǵaısa saltanatty túrde tabys etti.
–Barshańyzdy Respýblıka kúni merekesimen quttyqtaımyn! Búgin 65 adam jańa páterge ıe bolyp otyrsa, kóktemde júzden astam otbasyna osyndaı qýanysh syılaǵan bolatynbyz, –dedi qala ákimi.
Kóppáterli úılerdiń syrtqy saltanaty men ishki árlendirilýi kózdiń jaýyn alady. Sóz arasynda oblys ortalyǵynda toǵyz myńnan astam adam baspana kezeginde turǵandyǵyn aıta ketelik. Ústimizdegi jyly alty turǵyn úı salyndy, onyń ekeýi, mine, Respýblıka kúni merekesi qarsańynda tabys etilip otyr. Jyl sońyna deıin qalǵan turǵyn úıler paıdalanýǵa berilip, halyqty qýanyshqa keneltpek.
– Men tórt balanyń anasymyn, – deıdi jańa páterge ıe bolǵandardyń biri Natalıa Panasıýra. – Osy qýanyshty 17 jyl boıy saryla tosyp edim, mine, qolym endi jetip otyr. Balalarym da qýanyp jatyr. Adamnyń óz baspanasy bolǵanǵa ne jetsin. Bizge osyndaı qamqorlyq jasap otyrǵan memleketimizge myń da bir alǵys!
Páterge ıe bolǵandardyń ishinde 92 jastaǵy Kúmis alqa ıegeri, tyl eńbekkeri Sholpan Nuǵymanova da bar. Ájeıdiń qyzdary qart ananyń qýanyshyna ortaqtasyp, qonys toıyna qutty bolsyn aıta kelipti. Ǵasyrǵa jýyq ǵumyr keshken ájeı osyndaı qamqorlyq jasaǵan jandarǵa ájelik, analyq batasyn berip, aq alǵysyn joldady.
Páter kilti qolyna tıgen kópshilik ózderiniń ystyq uıalaryna aınalatyn baqyt bosaǵasyna asyǵa basyp tarap jatty.
Kókshetaý