Mızamshýaq mezgilge shomylyp turǵan megapolıste Respýblıka kúni merekesi qarsańynda eko-belsendilerdiń muryndyq bolýymen «Jańa Qazaqstan. Taza tabıǵat» atty jalpyqalalyq senbilik qana ótkizilip qoımaı, kúzgi kóshetter otyrǵyzyldy.
Almaty qalasy máslıhatynyń depýtattary da atsalysqan aksııanyń arqasynda demalys aımaqtary, saıabaqtar, skverler, aýla aýmaqtary aınadaı tazartyldy. 5 myń tekshe metrge jýyq qoqys jınalyp, 9 myńnan astam aǵash otyrǵyzyldy. Ekologııalyq naýqanǵa 34 myńnan astam qala turǵyny qatysyp, 239 tehnıka jumyldyryldy.
Negizgi tazalaý jumystary Kóktóbe baýraıynda, ALA saıabaǵynda, Almaty ındýstrııalyq aımaǵy men «Batys» zıratynyń sanıtarlyq-qorǵaý aımaǵy arasyndaǵy ýchaskede, Kókqaınar shaǵyn aýdanyndaǵy Boraldaı ózeniniń jaǵasynda ótti.
Kúzdiń erekshe jaımashýaq kúnderine tap kelgen senbilikte Almaty ákimdigi kóshet egý men tazalaýǵa qajetti qural-jabdyq (qolǵap, qap, kúrek, tyrma) berip, jınalǵan jurtty aýyz sý, tamaqpen qamtamasyz etti. Jyl saıyn ótetin saýapty bastama, mereke ispettes senbilik kezinde mádenı-oıyn-saýyq baǵdarlamasy da umyt qalmady. Al jınalǵan qoqys arnaýly polıgonǵa shyǵaryldy.
Jalpyqalalyq naýqanǵa aýdan ákimdikteri de qalys qalǵan joq, óz aýmaqtarynda kommýnaldyq qyzmettermen birigip Túrksib aýdanynda ÚAA boıyndaǵy Baým toǵaıynda, «Jas qanat» shaǵyn aýdanynda, Jetisý aýdanyndaǵy «Aınabulaq-4» shaǵyn aýdanynda, Medeý aýdanyndaǵy Kóktóbe baýraıynda, Almaly aýdanyndaǵy Saıran kóliniń shyǵys jaǵalaýynda, Áýezov aýdanyndaǵy Saıran kóliniń batys jaǵalaýynda, Alataý aýdanynda Boraldaı ózeniniń jaǵasynda, Bostandyq aýdanynda «Dostyq» saıabaǵynyń aýmaǵynda, Naýryzbaı aýdanyndaǵy Shuǵyla shaǵyn aýdanynda jergilikti senbilikter ótkizdi.
Oraıy kelip turǵanda Almatyda «Baldyrǵan» alleıasy paıda bolǵanyn atap ótý lázim. О́ıtkeni bıyl «Baldyrǵan» jýrnalynyń jaryq kórgenine 65 jyl tolyp otyr. Sondaı-aq jýrnaldyń tuńǵysh bas redaktory bolǵan Halyq jazýshysy Muzafar Álimbaevtyń týǵanyna – 100 jyl.
Bul basylymnyń búkil tarıhynda úsh qana redaktory bar. Jýrnaldy 27 jyl basqarǵan Muzaǵańnan keıin qazaqtyń klassık aqyny Tumaǵań, Tumanbaı Moldaǵalıev shırek ǵasyr shyǵardy. Qazirgi bas redaktory – Dúısenbek Maǵlumov.
Senbi kúni «Qazaq gazetteri» seriktestiginiń almatylyq qyzmetkerleri men jýrnal ujymy Almaty qalasynyń eń kórikti jerleriniń biri – Esentaı ózeniniń jaǵalaýyndaǵy Dostyq saıabaǵynda «Baldyrǵan» alleıasynyń ashylýyna qatysty. Áriptesterimiz gıbsıkýs tuqymdasyna jatatyn aǵash kóshetterin otyrǵyzdy.
ALMATY