43 túrli palaý daıyndaldy

Jyl saıyn shahar tórinde uıymdas­tyrylatyn merekelik is-shara bul joly Saıram tur­ǵyn alabyndaǵy Naýryz parkinde boldy. «Dýstlık» qaýym­das­tyǵynyń tóraǵasy Ikram­jan Hashım­janovtyń aıtýynsha, festıvaldi ótki­zýdegi maqsat – Respýblıka kúnin merekeleý jáne barlyq etnostardy bir dastarqan ba­syna jınap, dostyq pen tatý­lyqty nasıhattaý.

Uıymdastyrýshylar uıǵarymymen 43 túrli palaý basylyp, qatysýshylar 7 atalym boıynsha marapattalyp, eshkim júldesiz qalmady. Is-sharada 100 kılodan asa palaý pisirildi. 43 aspaz ózderiniń bar óne­rin salyp, dámdi as mázirin daıyn­dady. Festıvalde Shym­kent­tiń ózinen basqa respýblıka óńir­lerinen, kórshiles О́z­bek­stan, Qyrǵyzstan, Tájik­stan­nan kelgen aspazdar boldy.

Tájikstandyq aspaz Is­matýlla Rahımov osyndaı merekelik is-sharaǵa qatysyp jatqanyna qýanyshty ekenin jetkizdi. «Halyqtar dostyǵy jasaı bersin, birlikteri jo­ǵalmasyn» degen tilek arnap, elimizdi Respýblıka kúnimen quttyqtady. Tájik halqynda palaýdy «osh» deıdi eken. Al onyń daıyndalý ádisiniń de ózindik erekshelikteri bar. Palaýdan bólek aspaz bastap kelgen tájikstandyq qonaqtar ózderiniń ulttyq taǵamy «qury­tapty» ázirledi. Ol palaý­dan múl­dem ózgeshe. Qazaqtyń kádimgi qurty, sary maı, nanyn qo­syp jasaıdy. Festıval ba­rysynda tájik baýyrlar daıyndaǵan palaýlarynan kelýshilerge dám aýyz tıgizdi.

Úlken qazanǵa basylǵan palaýdan Saıram turǵyn alabynda ornalasqan jetimder úıine tamaq taratyldy. Etnos­aralyq tatýlyqty nyǵaıtýǵa úles qos­qan biraz azamattyń ıyqtaryna qazaqtyń dástúrimen shapan jabyldy. Sonymen birge el Prezıdenti, Qazaqstan halqy Assambleıasynyń tóraǵasy Qasym-Jomart Toqaevtyń sheshimimen birneshe adam «Jomart jan» medalimen, Qurmet gramotasymen, Al­ǵys hatpen marapattaldy. Osyn­daı marapat ıesiniń biri general-maıor, ishki ister or­gandarynyń ardageri Mol­dııar Orazalıev: «Qazaq-ózbek halyqtarynyń dostyǵy máńgi jasaı bersin, tatýlyq bolsa elde tynyshtyq bolady. Osy asyl qasıetimizdi jo­ǵalt­paıyq. Birlik bar jerde árdaıym bereke júredi. Qa­zaq pen ózbek – baýyrlas ult. Qan­sha ǵasyrdan beri tatý-tátti birge ǵumyr keship keledi. Sol týysqan halyqtardyń ara­syndaǵy dostyq qarym-qatynas eshqashan úzilmesin», degen tilegin arnady.

Is-shara barysynda óner­pazdar sahna tórinde qazaq pen ózbek halqynyń ánderin shyrqap, kelgen qonaqtardyń kóńilin kóterdi. Molynan jaıylǵan dastarqan ústinde qarııalar sóz bastap, salıqaly áńgimeniń tıegin aǵytty. Palaý festıvali – jyl saıyn ótetin dástúrli is-shara. Shym­kentte alǵash ret 2010 jyly uıymdastyryldy. Sodan beri úzdiksiz jalǵasyp keledi.

ShYMKENT