Oral qalasyndaǵy Nazarbaev zııatkerlik mektebiniń 12-synyp oqýshysy Azat Qappanov respýblıkalyq «El úmiti CUP 2023» debatynda «Úzdik spıker» atanyp, komandalyq oıynda 2-oryndy ıelendi.
Aǵylshyn lıgasy boıynsha alǵyrlyq tanytqan jas pikirsaıysshy endi Serbııa memleketinde ótetin halyqaralyq dodaǵa el atynan qatysatyn boldy.
Azat Astana qalasynda ótken grand-týrnırde Oraldaǵy Álııa Moldaǵulova atyndaǵy №38 mektep-lıseıiniń oqýshysymen birge bir komandada saıysqa tústi.
– Bul týrnırge bir aı boıy daıyndaldym. Qazaqstannyń ár túkpirinen eń myqty dep iriktelgen 40 shaqty pikirsaıysshy jınaldy. Olardyń arasynan ozyq ataný – men úshin úlken jetistik. Elimizdegi jáne jastar arasyndaǵy ózekti taqyryptardy qozǵadyq. Árıne, sabaqpen qosa bul saıysqa ázirlený ońaı bolmady. Aldaǵy ýaqytta halyqaralyq deńgeıde ótetin aǵylshyn lıgasynda el namysyn qorǵaýǵa bar kúshimdi salamyn, – deıdi Azat.
Aıta keteıik, halyqaralyq saıysqa attanǵaly otyrǵan úzdik debatshy ózi oqıtyn mekteptegi «Parasat» debat úıirmesiniń belsendi múshesi.
Batys Qazaqstan oblysy