Kúzge salym kórshi-qolań jınalyp, saqardan sabyn qaınatýdy qoıǵaly qaı zaman? Zaısan aýdany, Qaınar aýylynyń turǵyny Bıbátıma Ybyraıhan ǵana ǵoı deımin, umyt bolǵan ulttyq tehnologııamen sabyn óndirip otyr. Tabıǵı sabynǵa suranys ta joǵary.
– Sabyn qaınatý da ata-babamyzdan beri kele jatqan turmystyq salt-dástúr, – deıdi Bıbátıma Ybyraıhan qazanǵa maı quıyp jatyp. – Qazaqta kıiz basý, arqan esý, syrmaq syrý degen sekildi ónerdiń túrleri kóp. Sonyń biri – osy qazaqtyń qara sabyny. Burynǵy ájelerimizdiń appaq kımeshekterine qarap-aq sabynnyń sapasyn baıqaýǵa bolady, – deıdi.
Qara sabyn qaınatamyn dep qara qazannyń qasynda júrgen Bıbátıma apa sabyn qaınatýdyń ádis-tásilderi týraly túsindirip te berdi. Bylaı qarasaq, op-ońaı sekildi. Shóp pisip jetildi-aý degende osy úıdiń otaǵasy Aıdarhan Sádýaqas alabota shaýyp alyp kelip, ony órteıdi eken. Aıaqtyń astynda óse beretin alabota ósimdiginiń túıe alabota, sıyr alabota, qoı alabota degen sekildi birneshe túri bar. Bári de sabyn qaınatýǵa jaramdy. Sóıtip, órtegennen qalǵan kúldi ertesi kúni sýǵa qaınatady. Burq-sarq etip qaınaǵanda qap-qara kúl appaq kóbik bolyp kópirip, aq untaqqa aınalady. Saqar dep otyrǵandary sol. Odan ony maldyń ish maıyna qosyp ábden qaınatady da, qalyp retinde paıdalanyp júrgen keselerge salyp shyǵady. Kóp uzamaı ezilip turǵan suıyqtyq qatyp, kádimgi qara sabyn bolyp shyǵa keledi.
– Munymen 17 jastan bastap aınalysyp kelemin. Áýelde anamnan kórip, úırengen edim. Keıin kelin bolyp túskende enem aınalysty. Bul dástúrimiz keıin umytylyp qalmasyn dep jastarǵa kórsetken bolyp júrmin, – deıdi Bıbátıma Ybyraıhan.
Ulttyq tehnologııamen jasalatyn bul sabyn qoldyń kirin ǵana ketirip qoımaıdy, shashtyń túskenine, teri aýrýlaryna, bettiń sekpiline, tabannyń qıylǵanyna kómektesedi.
Shyǵys Qazaqstan oblysy,
Zaısan aýdany