Shaǵyn aýdandarǵa gaz keldi

Áýeli oblys ortalyǵy Tal­dyqorǵan qalasyndaǵy «Jas­tar-2» shaǵyn aýdanyna gaz be­rildi. Endi mundaǵy eki myńnan astam turǵyn kógildir otynnyń ıgiligin kóretin bolady.

О́ńirdegi árbir is-sharanyń basy-qasynda oblys ákiminiń orynbasary, qala ákimi men aýdan basshylary júrdi. Olar jurtshylyqty qýanyshtarymen quttyqtap, oblys kóleminde atqa­rylyp jatqan ıgilikti isterdi baıandady. О́z kezeginde qala ákimi Erat Bázil jańa shaǵyn aýdannyń ın­fra­qurylymyn damytý ju­mys­taryna keńinen toqtaldy.

«Jastar-2» shaǵyn aýdanynda 22 shaqyrymǵa gaz qubyry tartylyp, oǵan 295 mln teńgeden astam qarjy bólindi. 2022 jyly qurylys jumystaryn bastaǵan «Rem stroı» JShS búginde jobany tolyq aıaqtady. Sóıtip, 526 abonenttiń gazǵa qosylýyna múmkindik jasalyp otyr. 2025 jylǵa deıin qalanyń barlyq aımaǵyna gaz tartý josparlanǵan. Jalpy, «Jastar-2» turǵyn úı alabynyń ınfraqurylymyn jaqsartýǵa baǵyt­talǵan jumystar kezeń-ke­zeńimen atqarylyp keledi. Atap aıtqanda, munda 21 shaqy­rym­ǵa aýyz sý qubyry tartylyp, búginde turǵyndar 100 paıyz taza sýmen qamtylyp otyr», dedi E.Bázil.

Onyń aıtýynsha, turǵyn úı alabyn abattandyrý maqsatynda 16 kóshede zamanaýı úlgidegi 514 jaryq baǵany ornatylǵan. Budan bólek, joldyń sapasyn jaqsartý úshin 13 kósheniń 11,2 shaqyrymyna jobalyq-smetalyq qujattama ázirlenýde. Sol sııaqty Memleket basshysy Qasym-Jomart Toqaevtyń bastamasymen qolǵa alynyp jatqan «Jaıly mektep» jobasy aıasynda turǵyn úı alabynda 900 oryndy mektep qurylysyn júrgizý úshin jobalyq-smetalyq qujattamasy ázirlenip, keler jyly qurylys jumystary bas­talatyn bolady.

Infraqurylymdy damytý­dyń mańyzdy kezeńi retinde gaz qosý rásimine qatysqan jurt­shylyq qýanyshtaryn jasyr­mady. «Jastar-2» shaǵyn aýda­ny­nyń turǵyny Baqyt Ja­ńa­baeva kópshiliktiń atynan rahmet aıtty.

Sonymen qatar jyl sońyna deıin «Yntymaq» jeke turǵyn alabynyń 9500-ge jýyq turǵyny jáne Taldyqorǵan qalasynyń ishinde qalǵan ýchaskelerdegi 585 turǵyn gazǵa qol jetkizse, kele­si jyly Moınaq aýylyna gaz qubyry tartylyp bitýge tıis.

Oblystyq energetıka jáne tur­ǵyn úı-kommýnaldyq sha­rýa­shylyq basqarmasynyń máli­me­tinshe, josparǵa sáıkes 2025 jylǵa deıin Kerbulaq aýdanynan Taldyqorǵanǵa deıingi eldi mekender tolyq gazdandyrylýǵa tıis. Al 2030 jylǵa qaraı óńir­di gazdandyrý júz paıyzǵa je­te­di nemese 192 eldi mekendi qamtylady dep mejelenip otyr. Qazir oblysta 288 myń adam gazǵa qosylýǵa múmkindik jasalǵan, bul – halyqtyń 41,2 paıyzy. Jyl sońyna deıin josparlanǵan 20 shaqty joba tolyq aıaqtalǵanda, bul kórsetkish te óse túspekshi.

Odan bólek tabıǵı gazǵa Qaratal aýdanynyń 2300-den astam turǵyny qol jetkizdi. Jalpy, atalǵan aýdanda 35 eldi mekenniń 19-y gazdandyrýǵa jatady. 2019 jyly «Úshtóbe» avtomattandyrylǵan gaz taratý stansasy jáne quny 3,1 mlrd teńge bolatyn uzyndyǵy 44,7 km gaz qubyry paıdalanýǵa berildi. Qazirgi tańda aýdannyń 10 eldi mekeninde qurylys-montaj jumystary júrgizilýde. Al keshe kópten kútken gaz 530 tútini bar, ıaǵnı 1800 adam turatyn Kálpe aýyly men 530 turǵyny bar Oıan aýylyna da berildi.

Gazǵa birinshi bolyp qosyl­ǵan­dardyń biri – kálpelik Qaırat Sársenbaevtyń shańy­raǵy. «Qys boıy 5-6 tonnaǵa deıin kómir jaǵatynbyz. Bul qarapaıym otbasynyń qaltasyna edáýir salmaq túsiredi. Úıge kómir, otyn tasýyń kerek, ot jaǵasyń, kúl shyǵarý da ońaı emes. Endi mine, úıge gaz kirgizip, osy áýreshiliktiń bárinen arylyp, qýanyp otyrmyz», deıdi áýlettiń kelini Qarlyǵash О́skenbaeva.

О́ńir ákimi baspasóz qyz­me­tiniń málimetinshe, Kálpe aýylyna gaz jelilerin salý jumystaryn 2021 jyldan beri «Gas Energy Construction» JShS júrgizgen, oǵan 500,2 mln teńge bólinip, 27,1 km gaz qubyry tartyldy. Al Oıan aýylyn gazdandyrýǵa 86,9 mln teńge bólinip, 7,3 km gaz jelileri salyndy. Mundaǵy gazdandyrý jumystaryn da «Gas Energy Construction» JShS júrgizdi.

Oblystyq energetıka jáne TÚKSh basqarmasynyń habarlaýynsha, Qaratal aýdanyn gazdandyrý jalǵasady. Qazir Qanabek aýylynda iske qosý-retteý ju­mys­tary atqarylýda, al jyl sońyna deıin aýdannyń taǵy 8 aýlyn, ıaǵnı jalpy somasy 2,9 mlrd teńgege Jańatalap, Eskeldi bı, Kókdala, Qyzyljar, Dostyq, Tastóbe, Ortatóbe, Bastóbe aýyldaryn kezeń-kezeńimen gazdandyrý josparlanyp otyr. Sondaı-aq ótken jyldan bastap Úshtóbe qalasynda quny 7 mlrd teńge bolatyn gaz taratý jelileriniń qurylysy júrgizilýde. Búginde jobaǵa sáıkes josparlanǵan 148 km-diń 134 km gaz taratý jelileri salyndy, ıaǵnı jumystar 90,5 paıyz oryndaldy. Gazben jab­dyq­taý bıyl bastalady dep kú­tilýde.

Respýblıka kúni qarsańynda sarqandyqtar da bir shalqyp-tasyp qaldy. Sý jańa medısı­na­lyq pýnktter Birlik, Q.Qazybaev jáne Eshkiólmes aýyldarynda ashyldy. Olardyń árqaısysyna oblystyq bıýdjetten 35 mln teńge bólindi. Mańyzdy áleý­met­tik nysandar beıimdelgen nysandardyń ornyna salynyp, barlyq qajetti jabdyqpen qam­ty­lyp otyr. Endi atalǵan eldi me­kenderdiń 1100-den astam turǵyny úshin medısınalyq qyz­met­terdiń sapasy men qol­jetimdiligi burynǵydan da arta túspek.

«Aýyl turǵyndary da, dári­ger­ler de bul qýanyshty asyǵa kúttik. Burynǵy qoldanystaǵy medısınalyq pýnktter tıisti ta­laptarǵa sáıkes kelmeıtin úı-jaılarda bolǵan. Endi blok-modýldik panelderdi qol­da­ný­ arqasynda medpýnktter qysqa merzimde zama­naýı keıipke enip, qoldanysqa berildi. Ishinde bar­lyq qajetti jabdyǵy bar. Endi munda arnaıy mamandardy kes­te boıynsha jiberip otyramyz. Munyń bári aýyl tur­ǵyndaryna kór­setiletin medı­sınalyq qyz­met­­terdiń sapasyn arttyrýǵa yq­pal etedi dep oılaımyn», deı­­di Sarqan aýdany ortalyq aýrýha­­nasynyń dırektory Altaı Shylǵaýbaev.

Jalpy, Birlik aýylynda 590 adam, Q.Qazybaev aýylynda 313, Eshkiólmes aýylynda 205 adam turady. Turǵyndar buǵan deıin basy aýyrsa, aýdan ortalyǵyna shapqylap baratyn, endi irgedegi zamanaýı mekemege ıek súıemek.

«Búgin týǵan aýylymyzda jańa, zamanaýı medısınalyq pýnkt ashyldy. Bizdiń med­pýnk­timiz tozyp ketkendikten, qaralý úshin kórshi aýyldarǵa ba­rýǵa týra keletin. Jańa medpýnkt bizge jasalǵan merekelik tamasha syı boldy», deıdi Q.Qazybaev aýy­lynyń turǵyny Sáýle Qurmanǵalıeva.

Budan bólek Kemel Toqaev atyn­daǵy qaıyrymdylyq qory­nyń esebinen Úshtóbe qalasynyń dárigerlik ambýlatorııasy iske qosyldy. Ambýlatorııada kúni­ne 50 adam qabyldaıtyn 3 dári­gerlik ýchaske ornalasqan. Tirkelgen halyq sany – 3876 adam. Dárigerlik ambýlatorııada tirkeý bólimi, áıelderdi qaraý, dárigerge deıin qaralý, fızıoterapııa, emdik deneshynyqtyrý bólmesi, deni saý balalardy qa­byldaıtyn bólme, 5-kúndizgi em qabyldaıtyn stasıonar, prosedýra qabyldaıtyn jáne ekpe salatyn bólmelermen jabdyq­talǵan. 

Al shetkeri aýdandardyń biri Panfılovte búldirshinderdiń qýanyshy erekshe estildi. Kóktal aýylynda 100 oryndyq bala­baqsha ashyldy. Respýblıka kúni qarsańynda lentasy qıylǵan bala­baqshanyń qýanyshyna Pan­fı­lov aýdanynyń ákimi Marat Saǵymbek qatysyp, búl­dir­shinder men ata-analardy quttyqtady.

«Bul – bıyl ashylyp otyrǵan úshinshi balabaqsha. Jýyrda Golovaskıı aýylynda úlken balabaqshany ashý josparlanyp otyr. Ondaǵy kúrdeli jóndeý jumystary aıaqtalǵan soń paı­dalanýǵa beretin bolamyz», dedi aýdan ákimi M.Saǵymbek.

Jeke kásipker Kámshat Mol­dah­metova osy aýyldaǵy eski ǵımaratqa kúrdeli jóndeý jasap, 20-dan astam jumys ornyn ashty. Sonymen qatar Úlken Shyǵan aýy­lynda 90 orynǵa arnal­ǵan jáne Penjim aýylyn­da 100 orynǵa arnalǵan qos sport kesheni boı kóterdi. Qazir Jarkent óńiri jyldan-jylǵa damyp keledi.

Jetisý oblysy