Ulttyq mereke – Respýblıka kúni qarsańynda Premer-mınıstr Álıhan Smaıylov Memleket basshysynyń Jarlyǵyna sáıkes memlekettik organdar men uıymdardyń qyzmetkerlerine memlekettik nagradalar tabys etti.
Atap aıtqanda, «Parasat» ordenimen Qarjy mınıstrligi Qazynashylyq komıtetiniń tóraǵasy Rahat Toqbaev pen «Y.Altynsarın atyndaǵy Ulttyq bilim akademııasy» ShJQ RMK bas ǵylymı qyzmetkeri Jaýmbaı Qaraev marapattaldy.
Bir eskeretini, bıyl kóptegen pedagog pen dáriger memlekettik nagradalarǵa ıe boldy. Olardyń qatarynda otandyq transplantologııanyń sapaly jańa deńgeıge shyǵýyna jáne myńdaǵan naýqastyń tolyqqandy ómir súrý múmkindigin arttyrýǵa múmkindik beretin biregeı «QazMedics organ care system» otandyq júıesin ázirleýshiler de bar.
«Qurmet» ordenimen «Shymkent júrek ortalyǵy» KeAQ basqarma tóraǵasy Darhan Súıgenbaev, DSM Transplanttaýdy jáne joǵary tehnologııalyq medısınalyq qyzmetti úılestirý jónindegi respýblıkalyq ortalyqtyń dırektory Sáýle Shaısultanova, «Y.Altynsarın atyndaǵy Ulttyq bilim akademııasy» ShJQ RMK bas ǵylymı qyzmetkeri Ordenbek Mazbaev, sondaı-aq «Ulttyq ǵylymı kardıohırýrgııa ortalyǵy» KeAQ qyzmetkerleri: kardıohırýrgııa KAD dırektory Tımýr Lesbekov, ıntervensııalyq kardıologııa jáne radıologııa KAD dırektory Marat Arıpov, operasııalyq bólimshe meńgerýshisi Rymbaı Qalıev, dáriger kardıolog Saltanat Andosova, dáriger kardıohırýrg Ásel Medresova jáne Svetlana Novıkova marapattaldy.
«Ulttyq ǵylymı kardıohırýrgııa ortalyǵy» KeAQ operasııalyq meıirgeri Maral Shardenova «Eren eńbegi úshin» medaliniń ıegeri atandy. «University Medical Center» korporatıvtik qorynyń basqarma tóraǵasy Iýrıı Pıaǵa Qazaqstan Prezıdentiniń Alǵysy jarııalandy.
Sonymen qatar «Qurmet» ordenimen jáne «Eren eńbegi úshin» medalimen Aýyl sharýashylyǵy, Energetıka, Saýda jáne ıntegrasııa, Týrızm jáne sport, Sıfrlyq damý mınıstrlikteriniń, sondaı-aq Úkimet Apparatynyń qyzmetkerleri marapattaldy.