Rýdnyıdyń «Aıat» fýtzal klýby Horvatııanyń Omısh qalasynda ótip jatqan fýtzaldan Chempıondar lıgasynyń negizgi kezeńindegi alǵashqy oıynynda jeńilip qaldy.
Jerlesterimiz birinshi topta Portýgalııanyń «Sportıng», Horvatııanyń «Olmıssým» jáne Ýkraınanyń «Hıt» komandalarymen synǵa túsip jatyr. Toptyq saıystyń alǵashqy týrynda Rýdnyı komandasy jergilikti «Olmıssým» klýbymen kezdesip, asa tartysty ótken kezdesýde qarsylastaryna 3:2 esebimen jol berdi.
Birinshi kezeńde alań ıelerinen Djeremı Býkovsa mergendik tanytyp, komandasyn esepte alǵa shyǵarsa, ekinshi kezeńdi jerlesterimiz belsendi bastap, 25-mınýtta tarazy basyn teńestirdi. Gol avtory – Lýan Marselo. О́kinishke qaraı, arada eki mınýt ótkende horvatııalyq klýbtyń oıynshysy Antonıo Sekýlıch 47 sekýnd ishinde «Aıat» qaqpasyna eki gol soǵyp, «Olmıssýmdi» esepte qaıta alǵa shyǵardy – 3:1. 36-mınýtta «Aıat» sapynan Lýkas Iаn esep aıyrmasyn qysqartqanymen, jerlesterimizge tarazy basyn teńestirýge ýaqyt jetpeı qaldy. «Aıat» ekinshi týrda «Sportıngpen» kezdesse, 28 qazanda «Hıt» klýbymen oınaıdy. Topta alǵashqy úsh oryndy ıelengen komandalar elıtaly kezeńge joldama alady.