Premer-mınıstrdiń orynbasary Tamara Dúısenovanyń tóraǵalyǵymen ótken Respýblıkalyq úshjaqty komıssııanyń kezekti otyrysynda Qaýipsiz eńbek tujyrymdamasynyń 2030 jylǵa deıingi jobasy qarastyryldy. Otyrysqa ortalyq jáne jergilikti organdar, kásipodaq uıymy jáne qoǵamdyq birlestikter, jumys berýshi men jumysshylar konfederasııasynyń ókilderi qatysty.
Atalǵan tujyrymdama kásiporyndardaǵy eńbek qaýipsizdigin baǵalaý tártibin ózgertýdi kózdeıdi. Iаǵnı ár jumys ornyndaǵy táýekelderge nazar aýdarylmaq. Osylaısha, jumys berýshi men eńbek ınspeksııasyna táýekeli joǵary aýmaqtarǵa mán berip, tıisti sharalar qabyldaýǵa múmkindik beriledi.
Odan bólek, Eńbek jáne halyqty áleýmettik qorǵaý mınıstrligi zııandy eńbek jaǵdaıynda jumys isteıtinderge kórsetiletin áleýmettik qoldaýǵa baılanysty negizgi jańashyldyqtarymen bólisti. Oǵan sáıkes jasy 55-ten asqan, mindetti zeınetaqy jarnalaryn 7 jyl boıy aýdaryp otyrǵandarǵa arnaıy tólem engizý qarastyrylady. Qajetti qarajat memlekettik bıýdjet, BJZQ, ómirdi saqtandyrý kompanııalary men jumys berýshi tarapynan berilmek.
Sonymen qatar otyrysta kásiporyndardaǵy qazirgi jaǵdaı boıynsha málimet berildi. Osy oraıda óńirlik úshjaqty komıssııalar, jumys berýshi men jumysshylardyń múddelerin qorǵaýshylardyń qyzmetine qatysty syn aıtyldy. Eńbek jáne halyqty áleýmettik qorǵaý mınıstrligine óńirlerdegi áriptesterimen eńbek daýlarynyń aldyn alý ádistemesine qatysty túsindirme jumystaryn júrgizý tapsyryldy.