Memleket basshysy Qasym-Jomart Toqaev Qaraǵandy oblysynda «ArselorMıttal Temirtaý» aksıonerlik qoǵamyna qarasty Kostenko atyndaǵy shahtada bolǵan órt saldarynan qaza tapqan kenshilerdiń otbasylary men týǵan-týystaryna kóńil aıtty, dep habarlaıdy Egemen.kz Aqordanyń baspasóz qyzmetine silteme jasap.
«Men Memleket basshysy retinde barshańyzǵa kóńil aıtamyn. Bul – qasiret. Bárin túsinemin. Apat boldy. Apattyń kesirinen kóptegen adam qaza tapty. Sondyqtan bul jerge arnaıy keldim. Tıisti sharalar qabyldaımyz, sonyń ishinde zardap shekkenderdiń otbasylaryna kómek kórsetemiz. Qaza tapqandar men zardap shekkenderdiń otbasylary eshqandaı muqtajdyq kórmeýi úshin Úkimet, ákimdik jáne qaıyrymdylyq uıymdarynyń aldynda jan-jaqty kómek kórsetý mindeti tur», dedi Memleket basshysy.
Prezıdent búkil elimiz boıynsha 29 qazan Jalpyulttyq aza tutý kúni bolyp jarııalanatynyn jáne «ArselorMıttal Temirtaý» kompanııasyna qatysty tıisti shara qabyldanatynyn jetkizdi.
«Erteń búkil elimiz boıynsha jalpyulttyq aza tutý kúni jarııalanady. Men «ArselorMıttal Temirtaý» kompanııasymen ınvestısııalyq yntymaqtastyqty toqtatý jóninde tapsyrma berdim. Bul mekeme Úkimetpen jáne kásiporynmen yntymaqtastyq turǵysynan bizdiń tarıhymyzdaǵy eń nashar kompanııa boldy. Endi kásiporynnyń ózine qatysty sharalar qabyldaý týraly oılanýymyz kerek. Basın Vadım Borısovıch degen azamat bar. Sizder ony bilesizder. Ol bir kezderi «ArselorMıttalda» jumys istegen. Oblys ákiminiń orynbasary boldy. Men oǵan qaıtyp kelip, kásiporyndy basqarýdy tapsyramyn. Kásiporynnyń qazirgi basshylyǵynyń qolynan eshteńe kelmeıdi», dedi Qasym-Jomart Toqaev.