Memleket basshysynyń tapsyrmasy boıynsha Komıssııanyń sheshimimen Vadım Basın «ArselorMıttal Temirtaý» AQ bas dırektorynyń mindetin atqarýshy bolyp taǵaıyndaldy. Bul týraly Premer-mınıstrdiń baspasóz qyzmeti habarlady, dep jazady Egemen.kz.
V. Basın 2022 jylǵy qazan aıynan bastap Qaraǵandy oblysy ákiminiń birinshi orynbasary bolyp jumys isteıdi. Eńbek jolyn metallýrgııa kombınatynda elektromonter bolyp bastaǵan. Ulttyq quryltaı múshesi, «Qazaqstannyń Eńbek Eri» ataǵynyń ıegeri.
Buǵan deıin Qasym-Jomart Toqaev: «Basın Vadım Borısovıch degen azamat bar. Sizder ony bilesizder. Ol bir kezderi «ArselorMıttalda» jumys istegen. Oblys ákiminiń orynbasary boldy. Men oǵan qaıtyp kelip, kásiporyndy basqarýdy tapsyramyn. Kásiporynnyń qazirgi basshylyǵynyń qolynan eshteńe kelmeıdi», degen edi.