Fýtboldan Konferensııa lıgasynyń toptyq kezeńinde oınap jatqan elordanyń «Astanasy» kezekti týr básekesin Kosovada ótkizip, alǵashqy jeńisine qol jetkizdi. Syrt alańda jergilikti «Balkanı» komandasymen sheberlik baıqasqan jerlesterimiz qarsylastarynan 2:1 esebimen basym túsip, alǵashqy úsh upaımen jankúıerlerine úmit syılady.
Munyń aldyndaǵy eki týrda Grıgorıı Babaıan shákirtteri S tobynyń kóshbasshylary – Horvatııanyń «Dınamosy» men Chehııanyń «Vıktorııa» komandalarymen kezdesip, eki oıynda da jeńilip qaldy. Sóıtip, eki matchta múmkin bolǵan alty upaıdan qaǵylǵan «Astananyń» kelesi kezeńge ótý kórsetkishi kúrt tómendep ketken-di. Osy syrt alańda «Balkanımen» ótetin úshinshi týr «Astananyń» bolashaǵyn aıqyndap beretin matchtyń biri edi. О́ıtkeni jerlesterimiz bul oıynda jeńiske jetetin bolsa, qorjynǵa túsken úsh upaımen birge kelesi kezeńge shyǵý múmkindigin de tolyǵymen saqtap qalady. Al qatarynan úshinshi oıynda da jeńiletin bolsa, onda kelesi kezeńnen kúderin úzedi.
Jankúıerlerdiń qýanyshyna qaraı, «Astana» fýtbolshylary úshinshi matchta namysty qoldan bermeı, syrt alańda mańyzdy jeńiske qol jetkizdi. «Astana» men «Balkanı» komandalary bir-birimen alǵash ret jasyl alańda jolyǵyp otyr. Buǵan deıin tipti eki eldiń ulttyq quramalary da, ózge komandalary da múldem kezdespegen. Sondyqtan eki klýbty da statıstıka jaǵynan, múmkindigi turǵysynan da salystyra almaısyz. Al eki klýbty ázirge deıin baılanystyryp turǵan jalǵyz nárse – eki komanda da bıylǵy Eýrokýbok oıyndarynda Bolgarııanyń «Lýdogores» klýbynan jeńilip qalǵan.
Matchqa toqtalar bolsaq, «Astana» men «Balkanı» arasyndaǵy báseke Kosovonyń Prıshtına qalasynda ornalasqan kópsalaly «Fadıl Vokrı» stadıonynda ótti. Eki ujym da á degennen birden iske kirisip ketti. 16 myń jankúıerge arnap salynǵan stadıonda kórermenderdiń qarasy kóp bolmasa da, «Balkanı» jankúıerler qoldaýynan kende bolǵan joq. Degenmen jerlesterimiz syrt alańda oınap jatqanyna qaramastan kezdesýdiń 7-mınýtynda esep ashyp, teleekran arqyly tamashalap otyrǵan myńdaǵan jankúıerine qýanysh syılady. Gol avtory – Kamo Oganesıan. «Astanalyqtar» soǵylǵan golǵa shattanyp úlgeremin degenshe, alań ıeleri arada bir mınýt ótkende qarymta shabýyldan gol soǵyp, tarazy basyn teńestirdi. «Balkanı» sapynan Edvın Kých mergendigimen kózge tústi.
Oıynnyń alǵashqy on mınýty aıaqtalmaı jatyp, komandalar jyldam gol soǵyp alǵannan keıin jankúıerler bul oıynda goldardyń kóp bolatynynan úmitti edi. Biraq komandalar kórermenderdiń úmitin aqtaı almasa da, «Astana» kóp ýaqyt ótpeı «Balkanı» qaqpasyna ekinshi golyn soqqanda, úmitin úkilep otyrǵan kórermenderdiń kóńil kúıin bir kóterip tastady. Matchtyń 23-mınýtynda Tımýr Dosmaǵanbetovtiń buryshtamadan áýelete kótergen dobyna Abzal Beısebekov birinshi jetip, baspen «Balkanı» qaqpasyn dál kózdedi. Esep – 2:1. Bul esep tek birinshi taımnyń sońyna deıin emes, tóreshiniń aqyrǵy ysqyryǵyna deıin saqtalyp qaldy.
Osylaısha, elordalyq komanda toptyq kezeńdegi alǵashqy jeńisine qol jetkizdi. «Balkanı» komandasy ekinshi týrda óz alańynda Horvatııanyń «Dınamosyn» qabyldap, 1:0 esebimen basym túsken edi. «Astana» alǵashqy týrda «Dınamodan» syrt alańda 5:1 nátıjesimen ońbaı jeńilip edi. Endi araǵa eki apta salyp «Balkanı» elordaǵa sapar shegedi. Bul match 9 qarasha kúni «Astana Arena» stadıonynda ótedi.