Jumyspen qamtý qashanda mańyzdy. Dana halqymyz «qoly qımyldaǵannyń aýzy qımyldaıdy» dep beker aıtpaǵan. Bıyl óńirde 31 myń jańa jumys ornyn ashý kózdelse, onyń 25 myńy – turaqty jumys orny.
Bul sanamen salmaqtaǵan janǵa ánsheıin qurǵaq sıfrlar ǵana emes, oıǵa alǵan ońdy jospar ońynan ońǵarylsa, 30 myńnan asa adam otbasyn asyraıtyn, áleýmettik-turmystyq jaǵdaıyn birshama túzeıtin nátıjeli jumysqa ornalaspaq. Sondyqtan da bul baǵyttaǵy atqarylyp jatqan, áli de júzege asyrylatyn jospardyń júgi aýyr. Aımaqtyq jumyspen qamtý kartasy aıasynda osy jyldyń qyrkúıek aıynyń orta shenine deıin 24 243 jańa jumys orny ashyldy. Bul oraıda atqarylǵan sharýany ekshep, saralaıtyn bolsaq, aldymen ulttyq jobalardy júzege asyrý baǵytynda oń sıpattyń bar ekenin aıqyn ańǵarýǵa bolady. 299 ınfraqurylym jobasyn júzege asyrý barysynda 5 767 jumys orny uıymdastyrylǵan, onyń 2 179-y – turaqty, 3 588-i – ýaqytsha. Ýaqytsha bolǵanymen adamdar táp-táýir tabys taýyp, jaǵdaıyn jaqsartýǵa qol jetkizdi. Al turaqty jumys qashanda mártebeli.
Jańa jumys oryndary qaı tarapta júzege asyrylyp jatyr deıtin saýalǵa jaýap beretin bolsaq, eń aldymen kásipkerlikti damytý barysynda jaqsylyq nyshanynyń kóbirek ekenin baıqaýǵa bolady. О́ńir týrızmge óte qolaıly. Bul sala jyldan-jylǵa táp-táýir damyp kele jatyr. Týrısterge qyzmet kórsetý nysandarynyń kóbeıýimen birge, sapasy da jaqsara túsýde. Áli de bul baǵytta qyrýar jumys oryndaryn ashýǵa mol múmkindik bar. Esepti kezeń ishinde týrızm salasynda 197 jańa jumys ornyn ashý kózdelgen. Qyrkúıek aıynyń sońyna deıin jospar 66 paıyzǵa oryndalypty. Sondaı-aq sapaly bilim berý tóńireginde de jańa jumys oryndary ashylyp jatyr. Tutastaı shıyryp aıtqanda, 388 jumys orny ashylǵan. Buǵan qosa «Jasyl Qazaqstan», «Agroónerkásip keshenin damytý» baǵyttarynda da aýyz toltyryp aıtýǵa laıyqty tabys bar. Aıtalyq, agroónerkásip kesheninde 1 500 jańa jumys ornyn ashý kózdelse, bul jospar 118,6 paıyzǵa oryndalyp, 1 779 jańa jumys orny paıda bolǵan. Aldaǵy ýaqytta aýyl sharýashylyǵy táp-táýir damyǵan óńirde tabysy qomaqty jańa jumys oryndaryn kóbirek uıymdastyrýǵa ábden bolady. Demek, osy salaǵa kóbirek kúsh salǵan jón.
Sýbsıdııalanatyn jumys oryndaryn ashý baǵytynda da ilgerileý bar. Máselen, osy jyldyń 21 qyrkúıegine deıin 2 773 adam jumysqa ornalastyrylǵan. Bul baǵyttaǵy jumys aýqymy 115,3 paıyzǵa oryndaldy. Qoǵamdyq jumysqa 1 446 adam tartylǵan, áleýmettik jumys oryndaryna 348 adam ornalastyrylǵan. 529 jas alǵashqy tájirıbeden ótti. «Kúmis jas» baǵdarlamasy boıynsha 200-ge jýyq adam jumyspen qamtylyp otyr. Birer mysal keltire ketýge de bolady. Arshaly aýdanyndaǵy Volgodonovka selolyq okrýginiń turǵyny Sandýǵash Ikimova jergilikti ákimdikke jumysqa ornalastyrylsa, Baıanbaı Shanbaev «Balý» sharýa qojalyǵynda agronom bolyp eńbek etip jatyr.
Jumyspen qamtýdaǵy ózekti másele – jańa mamandyqty meńgerý. Bıyl 443 jumyssyz adam jumys berýshilerdiń usynystaryna oraı qysqamerzimdi kásibı daıarlaý kýrstaryn aıaqtady. Suranysqa ıe tiginshi, aspaz, shashtaraz tárizdi mamandyqtardy ıgergen jumyssyzdar jumysqa ornalasyp jatyr. Máselen, Atbasar aýdanynyń turǵyny Janat Janýlın gazelektrdánekerleýshi mamandyǵyn ıgergennen keıin «Qamqor Lokomotıv» jaýapkershiligi shekteýli seriktestigine shaqyrtý aldy. Mundaı mysaldardy kóptep keltirýge bolady.
141 adam grantqa ıe boldy. Onyń ishinde múmkindigi shekteýli adamdarmen birge kópbalaly otbasylardyń músheleri de bar. Tarıhı Otanyna oralǵan qandastarymyz da jumysqa ornalastyrylyp jatyr. Múmkindigi shekteýli 19 jasóspirimge qamqor bolyp otyrǵan otbasy músheleri de jaqsylyqtyń sharapatyn kórdi.
Buǵan deıin jumyssyz júrgen jastardy paıdaly eńbekpen qamtý tarapynda qyrýar jumys atqaryldy. Jalyndy jastardyń boıyndaǵy kúsh-jiger el ıgiligi úshin jumsalady.
Aqmola oblysy