Áleýmettik nysandardy aralady

Jalpy aýdany 2 520 sharshy metr bolatyn qos qabatty ǵımaratta ólke tarıhyna qa­tysty 350-ge jýyq eksponat qoıylǵan. Memleket basshysyna mýzeıdegi arheologııalyq artefaktiler, etnografııalyq jádigerler kórsetilip, Qaratal aýdanynyń tarıhy jáne jazýshy Kemel Toqaev, Qazaq KSR halyq ártisi Bıken Rımova, osy óńirden shyq­qan aqyn-jyraýlar, bı-sheshender men elge eńbegi sińgen basqa da tulǵalar týraly tyń derekter tanystyryldy.

Prezıdent mýzeıde jergilikti zııaly qaýym ókilderimen júz­desý barysynda murajaıdy aralap shyqqanyn, ondaǵy jádigerlerdi kóbeıtý kerek­tigin atap ótti. Sondaı-aq qoǵam damýy úshin mundaı mádenı nysandardyń qa­jet ekenine nazar aýdardy. Sonymen qatar Qasym-Jomart Toqaev Qurmetti qonaqtar kitabyna qoltańba qaldyrdy.

Odan ári Qasym-Jomart Toqaev Úsh­tóbe qalasyndaǵy áleý­mettik nysandardy aralap kórdi. Atap aıtqanda, bıyl ashylǵan 30 oryndyq jataqhanasy bar Gýmanıtarlyq kolledjge bardy. Munda bolashaq pedagogter «Mektepke deıingi tárbıe jáne oqytý», «Bastaýysh bilim berý pedagogıkasy jáne ádistemesi» mamandyqtary bo­ıyn­sha bilim alady.

Oqý ornynda 17 zamanaýı aýdıtorııa, májilis jáne sportzaldary, medı­sınalyq kabınet, ashana men býfet bar. Kolledj ınklıýzıvti orta talaptaryna saı jabdyqtalǵan, ıaǵnı erekshe qajettilikteri bar adamdar úshin pandýs pen arnaıy lıft qoıylǵan.

Sonymen qatar Memleket basshysy Úshtóbedegi orta mektepti aralap kórdi. Bilim oshaǵy 1963 jyly salynǵan. 1996 jyly mektepke Kemel Toqaevtyń esimi berilgen. Prezıdentke qa­lam­ger Kemel Toqaevtyń sha­ǵyn kabınet-murajaıy ta­nys­tyryldy. Munda jazýshynyń shyǵar­malary, tutynǵan jeke zattary qoıylǵan.

Sondaı-aq Memleket basshysy bıyl salynyp, halyq ıgiligine berilgen dá­riger­lik ambýlatorııa jumysymen tanys­ty. Atalǵan medısınalyq mekeme bir aýysymda 50 adamdy qabyldaı alady. Emdelýshiler úshin stasıonar, fızıoterapııa, prosedýralyq, ekpe salý, gınekologııa jáne basqa da medısınalyq kabınetter jumys isteıdi.

Odan ári Qasym-Jomart Toqaev Jetisý oblysy Qaratal aýdanynyń Kál­pe aýylyna bardy. Prezıdentke 200 oryndyq mádenıet úıi tanystyryldy. Bul nysannyń jalpy aýdany – 739 shar­shy metr. Mádenıet úıinde birneshe shyǵar­mashylyq úıirme jumys isteıdi.

Sonymen qatar Prezıdent osy aýylda boı kótergen sport kesheninde boldy. Nysannyń jalpy aýdany – 887,7 sharshy metr. Modýldi ǵımaratta sportzaly, balalar oıyn alańy jáne vorkaýt qarastyrylǵan.

Budan keıin Memleket basshysy Taldyqorǵan qalasyndaǵy jańadan salynǵan Jetysu Arena jabyq muz­aıdynyn aralap, sportshylarmen áńgi­­melesti. Sport nysany tolyqtaı jeke kásipkerdiń qarajatyna salynyp, Res­pýblıka kúni ashyl­ǵan. Jal­py ınvestısııa kólemi – shamamen 900 mıllıon teńge. Kásipker Muhametjan Se­rik­ulynyń aıtýynsha, bul nysanda turǵyndar short-trek, hokkeı jáne mánerlep syrǵanaý sııaqty qysqy sport túrlerimen aı­nalysa ala­dy. Sonymen qatar munda par­alım­­pıadalyq, ıaǵnı shanaly hokkeımen shuǵyldanýǵa bolady. Eli­mizde hok­­keıdiń bul túrimen aınalysýǵa arnalǵan eki muz arenasy bar. Onyń biri – Astanada, ekinshisi – osy Tal­dy­qorǵan qalasynda ashylyp otyr.

Nysannyń jalpy aýmaǵy – 2235,8 sharshy metr. Keshen kásibı tehnolo­gııalyq qural­darmen, onyń ishinde tońa­zytqysh, muz quıý jáne sport jab­­dyq­tarymen qamtylǵan. So­nyń nátı­jesinde munda jyl boıy úzdiksiz jat­tyǵýǵa múm­kindik bar. Atalǵan ja­byq mu­zaıdy­ny Qurlyqaralyq hokkeı lıgasynyń jáne Ulttyq hokkeı lıgasynyń standarttaryna saı keledi.

Qasym-Jomart Toqaev el ıgiligi úshin eńbek etip jatqan kásipkerge rıza­shylyǵyn bildirdi. Prezıdent sportshylarmen áńgimelesý kezinde memleket atalǵan salany odan ári qoldaıtynyna toqtalyp, jastardyń sportpen turaqty aınalysqanyn quptaıtynyn aıtty.