Taıaýda Zerendide 15 medısına qyzmetkerine jańa páter berilip, mereıi ósti.
Aq jeleńdi abzal jandarǵa 40 páterli kópqabatty úıden qyzmettik páterlerdiń kilti tabystalyp, jan jadyratarlyq jańalyqtyń kýási boldyq. Sóz arasynda jańa turǵyn úıdi «Kokshe Building Service» seriktestiginiń salǵanyn, jalpy aýdany 2 683,88 sharshy metrdi quraıtynyn aıta ketelik.
О́ńirdegi eldi mekenderge medısına qyzmetkerleriniń jetispeıtinin eskersek, aldaǵy ýaqytta osyndaı qamqorlyq ózge jerlerde de qolǵa alynsa, kópten beri kópshilikti tolǵandyryp kele jatqan mańyzdy másele ońynan sheshilip qalar edi. Osy oraıda Zerendi aýdandyq ákimdigi dittegen jerden shyǵyp otyrǵanyn aıtqan lázim. Baǵdarlama boıynsha jeti qyzmetkerge bir bólmeli páter, alty qyzmetkerge eki bólmeli páter, eki qyzmetkerge úsh bólmeli páter kilti usynyldy. Páterge ıe bolǵandardyń arasynda reanımotolog, transfýzıolog, narkolog, otolarıngolog tárizdi mamandar bar.
– Men aýdan ákiminiń grantyna ıe bolyp, ózim qalaǵan mamandyqty ıgergen edim. Kóp kómegi boldy. Alǵan mamandyǵym boıynsha týǵan jerime kelip eńbek etemin. Medısına qyzmetkerleriniń mereıin asyrǵan osy bir jaqsylyq jalǵyz bizge ǵana emes, halyqtyń densaýlyǵy úshin jasalyp jatqan qamqorlyq dep bilemin, – deıdi dáriger Zúlfııa Sholtysheva.
Ilkimdi is-sharaǵa qatysqan aýdan ákimi Ásen Jaqsylyqov aldaǵy ýaqytta múmkindiginshe baspana máselesi birtindep sheshile beretinin jetkizdi. Jyly da jaıly jańa páterge ıe bolǵan aq halatty abzal jandardyń alǵysy sheksiz. Olar aýdan basshylarymen birge bolashaq qutty uıalarymen tanysyp, qýanyshyn qoınyna syıǵyza almaı júr. Bul kún jaqsylyq sharapatymen qalyń qaýymnyń esinde qalar aqjarylqap kún boldy.
Aqmola oblysy,
Zerendi aýdany