«Eńbektiń kózin tapqan, baılyqtyń ózin tabady» degen danalyqqa den qoıǵan Balqash aýdanynyń dıqandary erte kóktemde 7 000 gektar sýarmaly jerge kúrish daqylyn sepken edi. Aq kúrishti ala jazdaı kútip-baptap, onyń ónip-ósýine kúsh salǵan aýdan sharýalary osy kúni oraqty aıaqtaýǵa jaqyn. Búginde atalǵan egis kóleminiń 5 454 gektary shabylyp, onyń 3 846 gektary bastyryldy.
Aýa raıynyń qolaıly sátin qalt jibermeı, ár eńbek kúnin utymdy paıdalanýdy maqsat etken dıqandar qaýymy qyzý eńbekke kirisip, qyrmandy aq marjanǵa toltyrý qamyna kiristi. Egis alqabynda da, qyrman basynda da – qarbalas tirlik. Egin jınaýda «О́tes», «Birlik» agrofırmalarymen qatar, «Tamshybulaq», «Baýyrjan-7» JShS jáne «Dınara» О́K-i kósh basynan kórinip keledi.
Kúrish ósirýdiń qyr-syryna qanyq «Birlik» JShS-nyń egis alqabynda jumys kidirissiz júrip jatyr. Atalǵan sharýashylyq kóktem aılarynda ózderine tıesili 1 360 gektar sýarmaly jerge kúrish daqylyn ekken edi. Jaz boıy kútimde bolǵan kúrish alqabyn tolyqtaı shaýyp, búginde onyń 865 gektaryn bastyryp úlgerdi. Buǵan qolda bar tehnıkanyń jetkilikti ári tolyqtaı jumys isteýi sep bolǵanyn aıtyp ótkenimiz lázim.
Kúrish oraǵyna 26 kombaın kiristi. Onyń altaýy shabý jumystaryn oıdaǵydaı atqaryp shyqsa, qalǵany shabylǵan kúrishtiń dánin jınaýmen aınalysyp júr. Sonymen qatar astyq tasý úshin 12 «MTZ-1221», 20 «MTZ-80» jáne 1 «YTO-1304» traktorlary jumyldyrylǵan.
«Bıylǵy jyly 950 gektar sýarmaly jerge bıdaı egip, ár gektarynan 25 sentnerden ónim alyp, 2 500 tonna astyqty dıirmenge ótkizdik. Buǵan qosa 3 250 gektar jerge egilgen kópjyldyq shópten úsh orym boıynsha qysqy mal azyǵyna 100 myń orama shóp daıyndadyq», degen agrofırma basshysy Almas Qystaýbaev kúzgi jıyn-terin jumystaryn tyńǵylyqty aıaqtaıtyndaryn atap ótti.
Naýqandyq jumystyń nátıjeli atqarylýynda Asqar Taıbaqov pen Erbolat Átenbekov bastaǵan tájirıbeli mehanızatorlar men sharýashylyq agronomy Dosjan Nyǵatovtyń eńbegi orasan zor. Osy ýaqytqa deıingi alynǵan kúrish ónimi gektarynan 45 sentnerden aınalsa, egin oraǵy aıaqtalǵansha bul kórsetkish 50 sentnerden asyp túserinen úmitti. Jyl saıyn aýyspaly egis alqabyn turaqty saqtap, «Karbomıd», «Amofos» tyńaıtqyshtaryn ýaqtyly qoldanyp, kúrish daqylynyń ósip-ónýine qajetti bar jaǵdaıdy jasaýdyń arqasynda mol ónim alýdyń múmkindigi artyp otyr.
Qyrman basyndaǵy eseli eńbekti qyzdyrǵan mehanızator Talǵat Jaıshybekov pen qyrman operatory Bolat Estaevtyń eńbegine de el rıza. Taýdaı bolǵan kúrish úıindilerin qyrman jumyskerleri de der kezinde sorttap, bitik dándi jaýyn-shashyn tımeıtin qoımalarǵa jetkizýge kúsh salyp jatyr. Osylaısha, aq marjandy tókpeı-shashpaı jınap alý jolynda jan aıanbaǵan eńbek adamdarynyń tabanaqy mańdaı terleriniń aqtalýyn biz de tiledik.
Almaty oblysy