Shamadan tys nese alý problemasyn túbegeıli sheshý úshin shekteýler engizý qajet. Bul pikirdi Úkimet otyrysynda Álıhan Smaıylov aıtty, dep habarlaıdy Egemen.kz.
Premerdiń paıymynsha, mıkroqarjy uıymdarynyń, ásirese «jalaqyǵa deıin» qaryz beretin mekemelerdiń shekti nesıeleý mólsherlemelerin, somalary men merzimderin qaıta qaraý qajet.
«Usynylyp otyrǵan barlyq zańnamalyq túzetýler pysyqtalyp, jyl sońyna deıin Parlamentke engizilýi tıis. Bul sharalar azamattardyń shamadan tys qaryz alýyn shekteýge jáne tutyný kredıtterin berýde táýekelderdi azaıtýǵa yqpal etedi», dep túsindirdi Úkimet basshysy.
Álıhan Smaıylov turǵyndardyń qarjylyq saýattylyǵyn arttyrý úshin Oqý-aǵartý mınıstrligi oqý baǵdarlamalary sheńberinde qarjylyq saýattylyq kýrstaryn engizý máselesin pysyqtaýy kerek dep esepteıdi.
«Ǵylym mınıstrligi de bul máselelerdi joǵary oqý oryndarymen birge qaraýy tıis. Kámeletke tolǵan jastar ózderiniń qarjylyq múmkindikterin qalaı durys esepteý kerektigin, kredıtti qalaı jáne qandaı kredıt alý kerektigin naqty túsinýi kerek. Mundaı tájirıbe kóptegen elderde bar», deıdi ol.