Senatta Inklıýzııa jónindegi keńestiń otyrysy ótip, qatysýshylar tóraǵany saılady, dep habarlaıdy Egemen.kz joǵarǵy Palatanyń baspasóz qyzmetine silteme jasap.
«Inklıýzııa jónindegi keńes Senat janynan qurylǵan bolatyn. Bul týraly Palata Tóraǵasy Máýlen Áshimbaev osy jyldyń qyrkúıek aıynda ótken «Múgedektigi bar adamdardyń ózekti máseleleri jáne olardy sheshý joldary» taqyrybyna arnalǵan dóńgelek ústel otyrysynda aıtty», delingen habarlamada.
Aldaǵy ýaqytta keńes músheleri múgedek adamdardyń ómirin jaqsartýǵa baǵyttalǵan usynystardy qabyldap, ony iske asyrý joldaryn ázirleýdi qolǵa alady.
Otyrys barysynda qatysýshylar keńes tóraǵasy laýazymyna senator Lázzat Qaltaevany laıyq dep sheshti. Depýtat áriptesterine alǵysyn bildirip, Keńes jumysynyń negizgi baǵyttaryn aıtty.
«Prezıdent Qasym-Jomart Toqaev múgedektigi bar adamdardyń máselesin sheshýge erekshe nazar aýdaryp keledi. Bul olardyń ómir súrý deńgeıin arttyrýǵa múmkindik beretin zańnamalyq jáne ınstıtýsıonaldyq bazany jetildirýge de qatysty. Parlament Senatynda Palata Tóraǵasy Máýlen Áshimbaevtyń qoldaýymen osy sala boıynsha júıeli túrde jumystar júzege asyp otyr. Keńes memlekettik organdardyń, jergilikti ózin-ózi basqarý organdarynyń, qoǵamdyq birlestikterdiń, ǵylymı jáne basqa da uıymdardyń yntymaqtastyǵyna arnalǵan alań. Sondyqtan olardyń maqsaty – múgedek adamdardyń quqyqtaryn qorǵaý, olar úshin teń múmkindikter jasaý jáne ómirdiń barlyq salalaryna qatysýǵa qol jetkizýdi qamtamasyz etý», dedi L.Qaltaeva.
Basqosýǵa eńbek jáne halyqty áleýmettik qorǵaý, oqý-aǵartý, mádenıet jáne aqparat mınıstrleriniń orynbasarlary, sondaı-aq sarapshylar men múddeli qoǵamdyq birlestikterdiń ókilderi qatysty.