Avtomobıl joldaryn qaqaǵan qysta kútip ustaý men saqtaýdyń erekshe ádisteri bar. Qalyń qardy syryp tastaǵannan keıin juqa qar kúnniń kózimen jipsip erip, shaǵyn oıyqtarǵa quıylady. Ol jerge qatqan muzdyń kólemi úlkeıip, asfaltty buzady. Sóıtip, burynǵy oıyqtardy úlkeıtip, shuńqyrǵa aınaldyrýy múmkin.
Al joldaǵy shuńqyrdyń qasireti qandaı bolatynyn barsha júrgizýshi biledi. Mundaı joldar, ásirese qysta óte qaýipti. Ekinshi másele, jipsigen qar túnde qatyp, joldy kóktaıǵaqqa aınaldyrady. Osynyń kesirinen de jol-kólik apaty bolyp jatady. Sondyqtan joldy qardan tazartqanda tolyq sypyryp ótken jón.
Joldardy qysta saqtaýdyń budan basqa da tolyp jatqan ádis-tásili bar. Osy bastan joldyń shetindegi qar ustaıtyn aǵash butaqtary, qýraı, kúzgi shóp bárin tazalap tastaý kerek. Áıtpese, aǵashtardaǵy qalyń qar joldy jaýyp tastaıdy. Jolaýshy tasymaly jáne avtomobıl joldary basqarmasynyń basshysy Maqsat Baıahmettiń aıtýynsha, jergilikti joldardy 2023-2024 jylǵy qys jáne kóktem aılarynda kútip-baptap ustaý úshin 1,3 mlrd teńge qarajat qarastyrylǵan. Bul qarajattyń 400 mln teńgesi tek qys aılary úshin bólingen. «Osy qarjy sheńberinde joldardy kútý jumystaryna alty uıymmen kelisimshart jasaldy. Olar 13 aýdannyń aýmaǵyndaǵy joldarǵa jaýapty», dedi M.Baıahmet.
Jalpy aıtqanda, qysta joldardy kútýge 142 tehnıka, 278 adam tartylmaq. Aýdannyń ishindegi joldardy saqtaýǵa da joǵaryda aıtylǵan qarjynyń 400 mln teńgesi bólingen. Bul qarajat aýdandyq deńgeıdegi barlyq 4 463 shaqyrym joldy tazalaýǵa jumsalady.
Joldardy qysta qardan tazartý, turyp qalǵan kólikterge kómek berý sekildi jumystar aýyl sharýashylyǵy kásiporyndaryna da júkteledi. Shamamen 220 aýyl sharýashylyǵy kásiporny 1,3 myń shaqyrymdyq joldyń saqtalýy men qaýipsizdigine jaýap berýge mindettelgen.
Jolaýshylar tasymaly basqarmasynda joldy qardan tazalaýǵa arnalǵan tehnıkalardyń ishinde shnekrotordyń alatyn orny erekshe kórinedi. Soltústik Qazaqstanǵa Memlekettik materıaldyq rezervten bul tehnıkanyń ekeýi bólingen. Olar qar barynsha bıik bolyp, úıilip qalǵan aımaqqa jedel jetkiziledi. Qazirgi tańda óńirde qar qalyń jaýatyn 266 ýchaskege qaraıtyn 863 shaqyrym jol anyqtalǵan. «Bul aımaqtar basqarmanyń jiti baqylaýynda», dedi M.Baıahmet.
Osy kúnderi basqarma jol shetindegi qar ustaıtyn qýraılar men shópterdi qyrqý, sýaǵar qubyrlardy tazalaý jáne kóktaıǵaqqa qarsy jolǵa sebiletin materıaldardy úıý jumystaryn uıymdastyryp keledi. «Qazir árbir aýdandaǵy jol ýchaskelerine jaýapty adamdardyń tizimin arnaıy buıryqtarmen bekitip jatyrmyz. Mundaı jumystar qıyn jaǵdaı bolǵanda kimniń tikeleı jaýapty ekenin birden anyqtaý úshin qajet. Belgilengen sharalar tegis oryndalsa, joldardaǵy apatqa jol berilmeıtini anyq», dedi basqarma ókili.
Soltústik Qazaqstan oblysy