Elimizde shekaradan ótken soń keri oralýǵa asyqpaıtyn, tipti jaltaratyn sheteldikterdi tártipke salatyn talap bar. Biraq Atyraýǵa kelgen sheteldikterdiń deni bul erejeni eskermeıtini baıqalady. Sheteldikterdiń keıbiri el shekarasynan zańsyz ótip, zań talabyn buzyp júr.
Máselen, Armenııa Respýblıkasynyń azamaty munaıly shaharǵa 2019 jyly qarashada kelgen. Kóshi-qon zańdylyǵynda belgilengen merzim ótkennen keıin 10 táýlikten asatyn kezeń ishinde el aýmaǵynan shyǵýǵa tıis edi. Alaıda sheteldik áıel óz erkimen elden ketýden jaltarǵan. Sheteldiktiń zańsyz áreketine qatysty is Atyraý qalasynyń ákimshilik quqyq buzýshylyqtar jónindegi mamandandyrylǵan sotynda qaraldy.
«Elimizdiń kóshi-qon týraly zańnamasyn buzǵan Armenııa Respýblıkasynyń azamaty kinásin moıyndap, jasaǵan áreketine ókinetinin bildirdi. Sot qaýlysymen ol ákimshilik quqyq buzýshylyq jasaǵany úshin kináli dep tanylyp, oǵan 86 myń 250 teńge mólsherinde ákimshilik aıyppul salý jazasy qoldanyldy», dep habarlady sottyń baspasóz qyzmeti.
О́zbekstan Respýblıkasynyń 44 jastaǵy azamaty da bıyl 21 sáýirde el shekarasynan zańsyz ótken. Onyń zańǵa qaıshy áreketin Qurmanǵazy aýdandyq polısııa bólimi qyzmetkerleri anyqtap otyr. Tipti sheteldiktiń jeke basyn kýálandyratyn qujaty da bolmaǵan. Sóıtip, ol kodekstiń 517-babynyń 7-bóliginiń talabyn buzǵan. Sheteldiktiń buryn el aýmaǵynan 5 jylǵa tysqary shyǵarylǵany anyqtaldy. Sol sebepten, kórshi el azamatyna qatysty Qylmystyq kodekstiń 392-babymen qylmystyq is qozǵaldy. Qurmanǵazy aýdandyq sotynyń úkimimen О́zbekstan Respýblıkasynyń azamaty kináli dep tanylyp, 6 aı merzimge bas bostandyǵynan aıyryldy. Sheteldikke el aýmaǵyna 5 jyl merzimge kelýge tyıym salyndy.
Elimizge taban tiregen sheteldikter jumys istep, tabys tabýdy kózdeıdi. Alaıda bul úshin jergilikti atqarýshy organnyń ruqsatyn alýǵa tıis. Biraq Mahambet aýdanyna kelgen О́zbekstannyń 19 azamaty bul talapty belden basyp, qurylysta, sharýa qojalyǵynda, kólik jóndeý ortalyǵynda, ashanalarda ruqsatsyz jumys istegen. Sol sebepten, aýdandyq sotta sheteldikter tarapynan ákimshilik quqyq buzýshylyqqa qatysty 19 ákimshilik is qaraldy. Shetel azamattaryna Ákimshilik quqyq buzýshylyq týraly kodekstiń 517-babynyń 5-bóligimen ákimshilik aıyp taǵylǵan. Sot qaýlysymen 19 sheteldik kináli dep tanylyp, árqaısysy 86 myń 250 teńgeden ákimshilik aıyppul arqalady.
Osy aýdanǵa kelgen taǵy bir ózbekstandyqtyń isi sotta qaraldy. Ol buryn elimizdiń kóshi-qon salasyndaǵy zańnamasyn buzǵany úshin Ákimshilik quqyq buzýshylyq týraly kodekstiń 517-babynyń 5-bóligimen ákimshilik jaýapqa tartylǵan. Alaıda ol 2023 jyldyń 17 naýryzynda Qazaqstan aýmaǵyna jeke maqsatpen kelip, jergilikti atqarýshy organnyń ruqsatynsyz seriktestikke jumysqa ornalasqan. Sóıtip, zańsyz eńbek qyzmetin júzege asyrǵan.
Aýdandyq sot ákimshilik isti qaraý kezinde sheteldiktiń jasy 63-te ekenin eskerdi. Sol sebepten, sheteldikke ákimshilik qamaýǵa alý jazasy qoldanylǵan joq. Biraq sot qaýlysymen О́zbekstan azamaty kináli dep tanylyp, oǵan el aýmaǵynan ákimshilik jolmen shyǵaryp jiberý túrindegi jaza taǵaıyndaldy.
Polısııa qyzmetkerleri 2 qazanda kóshi-qon zańnamasyn buzǵan 200-ge jýyq shetel azamatyn anyqtady. Onyń ishinde 151 sheteldik Ákimshilik quqyq buzýshylyq týraly kodekstiń 517-babynyń 3, 4, 5, 6 jáne 7-bólimin buzǵany úshin jaýapqa tartyldy. Atalǵan qujattyń 518-babymen 46 sheteldik jazalandy. Quqyq buzǵan 6 sheteldik azamattyq is júrgizý jáne ákimshilik tártibimen el aýmaǵynan shyǵaryldy. Al jeke basyn anyqtaıtyn qujattyń bolmaýyna baılanysty О́zbekstan Respýblıkasynyń 16 azamaty qabyldaý-taratý ornyna ornalastyryldy.
Shekten shyqqan sheteldiktiń biri – 1984 jylǵy azamattyń óz elinde alıment tóleýden jaltarǵany anyqtaldy. Ol 2 qazanda túngi mezgilde qoǵamdyq orynda mas kúıinde júrgen. «Patrýldik polısııa batalonynyń qyzmetkerleri sheteldiktiń jeke basyn kýálandyratyn qujatyn tekserdi. Sol kezde oǵan О́zbekstanda alıment tóleýden jaltarǵany úshin halyqaralyq izdeý jarııalanǵany anyqtaldy», dep málimdedi polısııa departamentiniń baspasóz qyzmetinen.
Atyraý oblysy