Taıaýda tilshilerge bergen suhbatynda Energetıka mınıstri Almasadam Sátqalıev suıytylǵan munaı gazynyń qazirgi baǵasy ózindik qunynan tómen ekenin aıtyp, bolashaqta birtindep qymbattaıtynyn jetkizgen bolatyn. «Osylaısha, suıytylǵan munaı gazynyń baǵasyn kezeń-kezeńimen, birden ósip ketpeıtindeı etip ózindik qunyna deıin jetkizemiz.
Bul naryq oıynshylarynyń shyǵynyna jol bermeý úshin kerek. Qazaqstanda qazir baǵa dıapazony bar. Bir lıtri – 50-80 teńge aralyǵynda. Degenmen bul ónimniń ózindik quny – keminde 110 teńge. Qazir ol baǵaǵa birden kótermeımiz, kezeń-kezeńimen soǵan jetkizemiz», dedi mınıstr.
Rasynda da, keıingi kúnderi elimiz boıynsha suıytylǵan gazǵa suranys artty. Avtogaz quıý beketterinde kezek kútken kólik qarasy kóbeıgen. Bireýler munyń sebebin jóndeý júrgizilip jatqan Atyraý munaı óńdeý zaýytymen tikeleı baılanystyrady. Qory sarqyla bastaǵan keıbir beket qojaıyndary lımıt qoıyp áýpirimdeı bastasa, endi bireýleri talon engizip, amaldaýǵa kóshken. Qalaı desek te, jolda júrgen jandar úshin janar-jaǵarmaı men gazdyń tapshy bolmaǵany hám qymbattamaǵany jaqsy. Biz osy máseleni egjeı-tegjeı bilý maqsatynda óńirlerdegi kólik gazy baǵasynyń jaı-kúıin baǵamdap kórdik.