Qazaqstannyń birinshi, álemniń 4-raketkasy Elena Rybakına WTA qorytyndy týrnırinde jartylaı fınalǵa shyǵa almady.
Álemniń úzdik segiz tennısshisi qatarynda synǵa túsken E.Rybakına sońǵy kezdesýinde, Belarýs ókili Arına Sobolenkoǵa 2:6, 6:3, 3:6 esebimen jol berdi.
Jańbyrǵa baılanysty keıinge qaldyrylǵan match 2,5 saǵattaı ýaqytqa sozylyp, onda E.Rybakına 5 eıs jasap, 12 breık-poınttyń úsheýin ǵana paıdalandy. A.Sobolenkonyń esebinde 6 eıs, 5 breık (10 breık-poınt) bar.
Osylaısha, WTA qorytyndy týrnırine alǵash ret qatysqan jerlesimiz óz tobynan jartylaı fınalǵa shyǵa almaı, 3-orynda qalyp qoıdy.
Atalǵan jarysta E.Rybakına 400 myńdaı dollar kóleminde tabys tapty.
Al jerlesimiz óner kórsetken topta kortqa shyqqan ekinshi jup – álemniń 5-raketkasy, amerıkalyq Djessıka Pegýla dúnıejúzilik reıtıngte 9-orynda turǵan grekııalyq Marııa Sakkarıdi 6:3, 6:2 esebimen utty.
Budan buryn amerıkalyq sportshy Elena Rybakına men Belarýs ókili Arına Sobolenkony jeńgen edi. Sóıtip, ol óz tobynan 1-orynmen jartylaı fınalǵa joldama aldy. Úsh ret jeńilis tapqan M.Sakkarı osy topta sońǵy orynǵa tústi.