О́zge etnos ókilderi de jappaı atsalysty

Jalpy, oblys boıynsha aýdan ákimderiniń saılaýyna barlyǵy 94 saılaý ýchaskesi bekitildi. Onyń 60-y Kerbulaq aýdanynda bolsa, qalǵany Sar­qan aýdanyna tıesili. Túrli sebepke baılanysty 5 saılaý ýchaskesi jumys istemedi. Odan bólek 2 aýdandyq aýmaq­tyq komıssııalardyń 21 mú­shesi, ýchaskelik saılaý ko­mıs­­sııalarynyń 538 múshesi ju­myldyryldy. Eki aýdannyń saılaýshylar sany 54 634 adamdy quraıdy. Kerbulaqta – 27 787, Sarqanda 26 847 adam tańdaý jasaýǵa quqyly.

Jaınaq batyr aýy­lynda №211 saılaý ýchaskesine attyń qulaǵynda oınaıtyn «Jaınaq» kókpar quramasynyń shabandozdary daýys berdi.

«Konstıtýsııalyq quqyǵy­myz­dy paıdalanyp, daýysymyzdy berdik. Aýdanymyz ha­lyq tańdaǵan ákim kómegimen gúl­deneri anyq», deıdi kók­parshylar. Olar jańa ákim ult­tyq oıyndarymyzdy ulyq­­tasa degen usynysyn da bil­dirdi. Sonymen qatar ózge etnos ókilderi de belsendilik tanytty. Altynemel aýyldyq okrýginde – 317, al Tastybastaý aýylynda 35 cheshen ulty ómir súredi. Solardyń barlyǵy óz tańdaýyn jasap, aýdannyń jandanýyn tiledi.

Kerbulaq aýdany Saılaý komıssııasynyń tóraǵasy Janat Býrahanov zań aıasynda eshqandaı quqyq buzýshylyq bolmaǵanyn jetkizdi. «Aýda­nymyzdaǵy 60 saılaý ýchas­kesiniń 59-y jumys istep otyr. Qazirgi ýaqytta ólke tur­ǵyn­darynyń deni óz daýysyn berdi. Naýqan baıqaýshylardyń qa­tysýymen, zań aıasynda ótip jatyr», deıdi J.Býrahanov.

Aıta keteıik, Jetisý óńi­rindegi eki aýdannyń áki­min saılaý dodasyna 14 kandıdat usynyldy. On kandıdatty alty saıası partııa usyn­sa, qalǵany ózin-ózi usynǵan. Úmit­ker­lerdiń kóbi – mem­le­kettik qyzmetkerler. Olardyń ortasha jasy – 46, onyń ishinde bireýi – áıel. Al eń ken­jesi 36 jastaǵy «Res­pýb­lı­ka» partııasynyń Sar­qan aýda­nyn­daǵy kandıdaty. Túrli se­bep­pen on kandıdat saılaý doda­synan shyǵyp qaldy. Osy­laısha, ár oblysta jer­gi­likti turǵyndar «Amanat» jáne «Respublica» partııalary usyn­ǵan eki kandıdattyń ishinen jańa ákimdi tańdady.

Jetisý oblysy