Aqtóbe qalasynyń №2 sotynda qarjy pıramıdasyn qurý jáne oǵan basshylyq etý, qylmystyq jolmen alynǵan qarjyny zańdastyrý aıybymen aqtóbelik kelinshekke qatysty qylmystyq is qaraldy.
Aıypker oryndyǵynda otyrǵan orta jastaǵy kelinshek Aqtóbe jáne Hromtaý qalasynda halyqaralyq uıymnyń táýelsiz ókili retinde tirkelip, 2019 jyldyń qańtarynan 2022 jyldyń maýsymyna deıin «Qnet» qarjy pıramıdasyn uıymdastyrǵan. Basynda ózin jelilik marketıng ókili retinde tanystyryp, jurttyń senimine kirgennen keıin olardy az ýaqytta orasan zor kiris ákeletin «Qnet» kompanııasyna qarjy salýǵa úgitteıdi. Eki jarym jyl ishinde 25 adam osy uıymnyń keńsesine 37 mıllıon 463 myń teńge ákelip bergen. Ýáde etilgen merzimde ınvestısııalyq tabys qolǵa tımegen salymshylar quqyq qorǵaý organdaryna shaǵymdanady. Sotta belgili bolǵandaı, pıramıdaǵa aldanǵan kópshilik ekinshi deńgeıli bankterden nesıe alyp, kompanııanyń keńsesine qolma-qol aqsha túrinde ákelip tapsyrǵan.
Qylmystyq is boıynsha aıyptalǵan kelinshek ózine taǵylǵan kináni tolyq moıyndap, isine ókinetinin aıtty. Asyraýynda jas sábıi bar ekendigin, zardap shekkenderdiń qarjysyn ózderine qaıtaryp bergenin alǵa tarta otyryp sottan jazasyn jeńildetýdi surady. Sot onyń qylmystyq jolmen tabylǵan múlkin tárkileýge jaza kesti. Sottalýshy jaza merzimin ótep bolǵannan keıin de kommersııalyq uıymdarda jeti jyl merzimge deıin laýazymdy qyzmet atqara almaıdy. Alaıda sýdıa sottalýshynyń asyraýynda 4 jastaǵy balasynyń baryn eskere otyryp, Qylmystyq kodekstiń 74-baby negizinde jaza óteý merzimin 5 jylǵa keıin qaldyrdy.
Sondaı-aq Aqtóbe qalalyq №2 sotynda «Garant 24 lombard» qarjy pıramıdasy boıynsha da qylmystyq is qaralyp jatyr. Bul is boıynsha birneshe aıyptalýshy bar, al zardap shekkender sany óte kóp.
Aqtóbe oblysy