Kóshege shekarashy esimi berildi

Almaty oblysyna qarasty Talǵar aýda­nynyń Panfılov aýylynda qapy­da qaza tapqan shekarashylardyń esi­min urpaq jadynda jańǵyrtýǵa ar­nal­ǵan taǵylymdy is-shara ótti. She­ka­ra qyzmetiniń dırektory bol­ǵan­ Turǵanbek Stambekovtiń esimi kóshege berilip, alleıa ashyldy. Alań­qaı­dyń kire berisindegi 27 áskerı qyzmetshiniń esimi qashap jazyl­ǵan memorıaldy taq­ta olardyń el júregindegi ekin­shi ómiri bastalǵanyn aıshyqtap tur.

Taǵzym is-sharasynyń shymyl­dy­ǵyn ashqan general-maıor Toqtasyn Buzybaev juldyzy endi jar­qyrap kele jatqan shaǵynda aǵyp túsken T.Stambekov týra­ly áserli estelik aıtyp, is-sharanyń ótýine muryndyq bolǵan jaqyn­da­ryna alǵys bildirdi.

– Sardar shekarashylardyń bilim ustahanasynda basshylyq qyzmet atqardy. Tájik-aýǵan shekarasyn kirpik qaqpaı kúzetken batalonnyń ko­man­dıri boldy. Elimizdiń shy­ǵys­taǵy, ońtústiktegi óńirlik bas­qarmalaryn basqaryp, mem­le­kettik shekara buzýshylar men kontrabandashylarmen ymyrasyz kúreskenin onymen birge qoıan-qoltyq qyzmet atqarǵan aǵa býyn shekarashylar jaqsy biledi. 2012 jyldyń maýsymynda Prezıdent Jar­lyǵymen Shekara qyzmeti dı­rek­torynyń mindetin ýaqytsha at­qa­­rýshy bolyp taǵaıyndalǵan T.Stambekov óziniń kúsh-jigerin «Qazaqstan Respýblıkasynyń Mem­le­­­kettik shekarasy týraly» jańa zań jobasyn ázirleýge baǵyttady. 2013 jyldyń 15 qańtarynda zań kúshine endi. Qazirgi zamannyń talaptaryn eskere otyryp, vedomstvo basshysy shekara qyzmetiniń túbegeıli reformasyn júzege asyrýdy kózdedi. Bul, eń aldymen, merzimdi sarbazdardy kelisimsharttyń áskerı qyzmetshileri kontın­gen­timen almastyrýǵa, jańa úlgidegi áskerı qalashyqtar salý sekil­di aýqymdy sharalarǵa qatysty bol­dy, – dep atap ótti T.Buzybaev.

Turǵanbek Muhametqalıuly 1961 jyly Almaty oblysynda dúnıege kelgen. Almatydaǵy joǵary shekara komandalyq ýchılıshesin 1983 jyly bitirip, alǵashqy kásiptik eńbek jolyn qazirgi Panfılov aýdany boıynsha shekara basqarmasynyń alystaǵy shekara bólimsheleriniń birinde bastady. Osy kezeńnen tabandy, talapty ofıser retinde tanylyp, qolynan qarýyn tastamaı, elimizdiń shekarasyn kirpik qaqpaı kúzetti. Polkovnık shenin merziminen buryn alǵan shekarashy ofıser II dárejeli «Aıbyn» ordenimen, 25 úki­mettik nagradamen marapattaldy, «Qur­metti shekarashy» atandy. Pre­zı­­dent Jarlyǵymen, polkovnık T.Stam­be­kovke (qaza bolǵannan keıin)  I dárejeli «Aıbyn» ordeni berildi.

Is-sharada Turǵanbek Muha­met­­qalı­ulynyń baýyry Gúlnar Stam­be­ko­va, UQK Shekara qyz­meti Almaty ob­ly­sy boıyn­sha de­partamentiniń bas­tyǵy, pol­kovnık Álibek Kaıýpov bas­­ta­ǵan áriptesteri aıbyndy aza­mat­ty­ eske aldy.

– Men Turǵanbek Muhamet­qa­lıulymen eki myńynshy jyldary Úsharal shekara jasaǵynda qoıan-qoltyq qyzmet atqardym. Shekara qyzmetindegi osy bir óte isker áskerı basshy shyn máninde shekara úshin týǵan naǵyz patrıottyń ózi edi. Budan keıin taǵdyr bizdi Shonjy shekara jasaǵynda kezdestirip, ol áskerı bólimniń komandıri, men onyń birinshi orynbasary-shtab bastyǵy boldym. Meniń jadymda ofıser óziniń jınaqy, shıraq júris-turysymen, mádenıetti, tárbıeli sózderimen, naǵyz qolbasshyǵa ǵana tán erekshe qasıetterimen qaldy. Ol istiń adamy edi. Boıyn­daǵy adaldyq, óz jumysyna shek­siz berilgendik, jas kadrlarǵa qam­qor­ly­ǵy – ofıserdi basqalardan daralap turatyn, – dedi Á.Kaıýpov.

Áýe apatynan qaza tapqan áskerı qyz­met­shilerdiń týǵan-týystary, shekarashy ardagerler men áskerı qyzmetshiler, qala­daǵy «Jas shekarashy» áskerı-patrıottyq klýbynyń múshe­le­ri qatysqan rásim polkovnık Stam­bekov atyndaǵy alleıaǵa 27 shyrsha otyrǵyzý sharasymen túıindeldi.

Almaty