О́tken jeksenbide elimiz mańyzdy taǵy bir saıası belesti baǵyndyrdy. 5 qarashada alǵash ret aýdandar men oblystyq mańyzy bar qalalardyń ákimderin saılaý ótti.
Prezıdent Qasym-Jomart Toqaev bıylǵy Joldaýda bul naýqan qanatqaqty rejimde bastalatynyn málimdegen bolatyn. Soǵan sáıkes saıası báseke ótetin mezgil belgilenip, daıyndyq jumystary bastalyp ketti.
«Aımaqtaǵy atqarýshy bıliktiń sheshim qabyldaý isine azamattardyń tikeleı qatysý múmkindigin birtindep arttyrý da mańyzdy. Aýyl, kent jáne aýyldyq okrýg ákimderin turǵyndar ózderi saılaı bastaǵanyna eki jyldan asty. Sodan beri aýyldyq deńgeıdegi ákimderdiń tórtten úshi saılandy. Endi aýdan jáne oblystyq deńgeıdegi qala ákimderin saılap kóremiz», dedi Memleket basshysy.
Ortalyq saılaý komıssııasy taratqan málimetke súıensek, oblystardyń máslıhattary osy saılaýdy ótkizý úshin 42 aýdan men 3 oblystyq mańyzy bar qalanyń tizbesin bekitti. 1 553 saılaý komıssııasy: 17 oblystyq, 3 qalalyq, 42 aýdandyq jáne 1 491 ýchaskelik saılaý komıssııasy jumyldyryldy.
Saılaý balama negizde ótti. Saılaý bıýlletenderine 125 kandıdat engizildi. Saıası básekege qatysyp, tańdaýyn jasaǵandar sany 62,79 paıyzdy qurady. Saılanǵan ákimderdiń ortasha jasy 46,7 jasty quraıdy.
Saılaý naýqany respýblıkanyń saılaý zańnamasy normalarynyń talaptaryna sáıkes ótti. Daýys berý kúni baıqaýdy kandıdattardyń 8 500-ge jýyq senim bildirilgen adamy, baıqaýshy men BAQ ókili júzege asyrdy.
Oblystyq saılaý komıssııalary usynǵan málimetterge sáıkes, elorda ýaqytymen saǵat 07.00-degi jaǵdaı boıynsha óńirlerde barlyq 1491 aýdandyq jáne qalalyq saılaý ýchaskeleri daýys berýge kiristi.
Eń iri 305 saılaý ýchaskesinde (1 000-nan asa saılaýshy) SDIAО́M jáne «Azamattarǵa arnalǵan úkimet» KeAQ-men birlesip, saılaýshylar tizimine kirmegen, biraq saılaý ýchaskesiniń aýmaǵynda turatyn mekenjaı málimetterin tekserý úshin servıs uıymdastyryldy.
Jambyl jáne Túrkistan oblystarynyń 3 saılaý ýchaskesinde «Qazaqstan Respýblıkasyndaǵy saılaý týraly» Konstıtýsııalyq zań sheńberinde aýmaqtyq saılaý komıssııalarynyń qabyldanǵan sheshimderine sáıkes daýys berý tańǵy saǵat 06.00-de bastaldy.
Qazaqstan Respýblıkasynyń aýmaǵyndaǵy ýaqyt beldeýleriniń shekaralaryna sáıkes 5 óńirdiń: Aqtóbe, Atyraý, Batys Qazaqstan, Qyzylorda jáne Mańǵystaý oblystarynyń saılaý ýchaskeleri Astana ýaqyty boıynsha saǵat 08.00-de ashyldy. Saılaýshylar tizimine 1 062 327 azamat engizildi.