Bul kúnderi álemniń ár qıyrynda tennısten túrli týrnır ótip jatyr. Solardyń birqatarynda jerlesterimiz de baq synady.
Beıbit Juqaev keshe ǵana AQSh-tyń Sharlotsvıll qalasynda aıaqtalǵan jarysta jeńimpaz atandy. Bastapqy básekelerde Taı-Sona Kvıatkovskı (AQSh), Inıakı Montesa de la Torre (Ispanııa) jáne Nıno Serdarýshıchke (Horvatııa) san soqtyrǵan qandasymyz jartylaı fınalda Patrık Kıpsondy qapy qaldyrdy. Bir jarym saǵatqa sozylǵan saıys 6:4, 7:6 esebimen aıaqtaldy. Fınalda Beıbit Eıden Maıodan (AQSh) aılasyn asyrdy. Bul básekede 6:3, 6:4 esebi tirkeldi. Osy jeńisiniń arqasynda ol 10 840 dollardy qaltasyna basty. Osylaısha, Beıbit óziniń sporttyq mansabynda tuńǵysh ret «Chellendjer» sanatyndaǵy jarysta bas júldeni oljalady.
Fınlıandııanyń bas shahary Helsınkıdegi týrnırdiń tusaýkeser kezdesýinde Denıs Evseev dál sol memlekettiń ókili Otso Martıkaınendi 6:4, 6:1 esebimen erkin eńserdi.