Elimizde qanatqaqty joba retinde tuńǵysh ret ákimi saılanǵan 42 aýdannyń biri – Beıneý. Aýdanda ornalasqan saılaý ýchaskeleri jumysyn tańǵy saǵat 7-de memlekettik ánuran oryndaýmen bastady.
Aýdan boıynsha 40 134 adam daýys berý quqyǵyna ıe, olar úshin barlyǵy 30 saılaý ýchaskesi jumys istedi. 17 ýchaske aýdan ortalyǵy Beıneýde, qalǵan 13 ýchaske aýyldyq jerlerde ornalasqan.
Daýys berýshiler arasynda bıyl 18 jasqa tolyp, saılaýǵa tuńǵysh qatysyp otyrǵandar da, ǵasyr jasynan asqan áje men eńbek ardagerleri de bar. «Mereıli otbasy» atanǵan Tastemirovter áýleti Syńǵyrlaý aýylynda ornalasqan saılaý ýchaskesinde daýys berdi. Otaǵasy 94 jastaǵy Shalabaı aqsaqal men otanasy 85 jastaǵy О́ris ana búginde 13 bala, 45 nemere, 58 shóbere tárbıelep otyr. Olar aýdan úshin mańyzdy kúnde balalarymen birge kelip, óz tańdaýyn jasady. Tastemirovter áýleti úlkenderiniń aıtýynsha, búgingi saılaý aýdannyń aldaǵy bolashaǵyn jarqyn etip, jańa tynys syılaıdy.
«Aýdanymyzdyń ósip-órkendeýi, jastarymyzdyń tárbıeli de bilimdi bolýy árdaıym mańyzdy. Saılaý berekeli aýdanymyzdyń odan ári damýyna serpin beredi dep senemiz. Eń bastysy, eldiń tynyshtyǵyn tileımiz», dedi olar.
Aýdan ákimdigine 3 adam úmitker retinde tirkelgen edi. Saılaý qorytyndysy boıynsha Nurtas Salıge – 2 178, Eset Haırýllınge – 213, Rahymjan Shalbaevqa 8 556 daýys berilgen. Al «Bárine qarsymyn» belgisi bar bıýlletender sany – 202. Saılaý qorytyndysy boıynsha Beıneý aýdanynyń ákimi bolyp aýdan ákiminiń orynbasary qyzmetin atqarǵan Rahymjan Shalbaev saılandy.
Mańǵystaý oblysy