Pákistannyń bas shahary – Islam-abadta taekvondodan ótken «Asian Open Championship» týrnırinen Qazaqstannyń ulttyq quramasy mol oljamen oraldy.
G2 sanatyndaǵy jarysta jerlesterimiz 13 júlde jeńip aldy. Tarqatyp aıtsaq, 5 altyn, 1 kúmis jáne 7 qola medal oljaladyq. Ásirese, biz +73 kg salmaq dárejesinde synǵa túsken Jansel Denızdiń asqan sheberligine tánti boldyq. Azııa oıyndary, qurlyq chempıonaty jáne Islam yntymaqtastyǵy oıyndarynda eki retten jeńis tuǵyryna kóterilgen burymdymyz barlyq qarsylasyn aıqyn basymdyqpen utyp, altynnan alqa taqty. Narǵyz Qoıshybekova (46 kg), Marııa Sevostıanova (57 kg), Javohırhan Islamov (58 kg) jáne Nuraı Qusaıynova (67 kg) da dál sondaı qurmetke bólendi. Aqtyq aıqasqa deıin alqynbaı jetkenimen sheshýshi tusta jeńilis tapqan Aıdana Edilbaeva (46 kg) kúmispen kúpteldi.
Al Araılym Asqarova (57 kg), Samırhon Ababakırov (58 kg), Jadyra Haırýllına (67 kg), Dıana Ábsenova (73 kg), Beksultan Musahan (68 kg), Eldar Birimbaı (68 kg) jáne Nurbol Ersaıynov (87 kg) qolaǵa qol sozdy.