Jýyrda bas qala júrgizýshileri kógildir otyn tapshylyǵyna shaǵymdanǵan edi. Osy tusta Energetıka mınıstri Almasadam Sátqalıev Astanada gaz tapshylyǵy neden bolǵanyn túsindirip berdi, dep habarlaıdy Egemen.kz.
Mınıstrdiń aıtýynsha, Qazaqstanda suıytylǵan munaı gazynyń baǵasy AI-92 benzıni men dızel otynymen salystyrǵanda aıtarlyqtaı tómen. Bul avtomobılderdi janarmaıdyń osy túrine jappaı kóshirýge sebep boldy. Onyń ústine júrgizýshilerdiń basym bóligi kólikterin gazǵa aýystyra bastady.
«Energetıka mınıstrligi bul resýrs elimizde shekteýli ekenin birneshe ret málimdegen, tutynýdyń munshalyqty ósýin qanaǵattandyrýǵa jetkiliksiz. Biz bul týraly kólik ıelerine aldyn ala eskerttik», dedi Almasadam Sátqalıev.
Resmı derekke sáıkes, jyl basynan beri suıytylǵan munaı gazyn tutyný 25%-dan astamǵa ósken. Endi qalyptasqan tapshylyqty joıý úshin mınıstrlik tarapynan tıimdi sharalar qabyldanǵany oryndy.
«Tapshylyqty jabý úshin birqatar shara qabyldadyq. Máselen, TShO shamamen 66 paıyzyn ishki naryqqa jiberdi. Biz «Qazmunaıgazdan» aı saıyn 10 myń kólem alyp otyrdyq, ıaǵnı, olardyń barlyq kólemin ishki naryqqa shyǵardyq. Alaıda resýrs shekteýli. Qazir suıytylǵan munaı gazyn óndirý deńgeıinde balans ustap otyrmyz. Eger munaı óńdeý zaýyttarynyń birine jóndeý júrgizilse, kólemder el boıynsha qaıta bólinetini jáne olardy qolmen basqarýǵa týra keletini anyq. Astanada osy jaǵdaı boldy», dep túsindirdi mınıstr.