Múlde oılamaǵan jerden úlken qýanyshqa kenelip jatsańyz, tańǵalmańyz. Áýe kemesine minip, Oral – Almaty baǵytynda ushyp kelgen Qaırat Manabaevty oıǵa kirip-shyqpaǵan tosyn sáttilik kútip aldy.
Bıyl Halyqaralyq Almaty áýejaıy úshin jolaýshylar aǵynynyń rekordtyq kórsetkishi tirkeldi. Jyl aıaqtala qoımasa da, bıyldyqqa 8 mıllıon azamat áýejaı qyzmetin paıdalanǵan. Qaırattyń enshisine dáp sol segiz mıllıonynshy sátti bılet buıyrypty. Joly bolǵan jolaýshyny áýejaı basshylyǵy qýanyshpen qarsy alyp, eki kisige arnalǵan demalys sertıfıkatyn tabystady. Osylaısha, Qaırat jaqyn jandarynyń birimen Grýzııa eline saıahatqa attanbaq.
«Bul – áýejaı úshin de, Almaty qalasy úshin de tarıhı oqıǵa. Nege deseńiz, Almaty áýejaıynyń búkil tarıhynda alǵash ret jolaýshylar aǵyny 8 mln adamǵa jetip otyr. Byltyr biz arqyly 7,2 mln jolaýshy áýe kemesimen qatynaǵan. Ujym atynan týrıstik saparǵa joldama utyp alǵan azamatty quttyqtaımyz», deıdi Almaty Halyqaralyq áýejaıynyń prezıdenti Alyp Er Týnga Ersoı.
Aıtpaqshy, elimizdiń áýe qaqpasy sanalatyn Almaty aılaǵynyń ótkizý qabiletin arttyrý maqsatynda jańa Halyqaralyq jolaýshylar termınalynyń qurylysy júrip jatyr. Keshen keler jyldyń jaz aıynda aıaqtalmaq. Sý jańa ǵımarat bort kólemine baılanysty bir ýaqytta jeti ushaqqa deıin qabyldaýǵa qaýqarly. Al áýejaıdyń jalpy ótkizý qabileti jylyna 14 mln jolaýshyǵa deıin artpaq.
Jobaǵa sáıkes qurylym qoldanystaǵy termınal ǵımaratyna jerústi ótkeli arqyly qosylady. Jańa úlgi jolaýshylarǵa ǵımarattyń syrtyna shyqpaı-aq, ishki jáne halyqaralyq reısterden aýysýǵa ońaı qol jetkizýdi qamtamasyz etpek. Osylaısha, jańa termınal tek halyqaralyq reısterge, al qoldanystaǵy termınal ishki reısterge qyzmet kórsetedi.
ALMATY