«Dúnıeden ómirim bitip, ótsem de ózim, aralap jerdiń júzin júrer sózim..» deıtin áıgili Syr súleıi Turmaǵambettiń taqııasy men tutynǵan basqa da zattary aqyn esimimen atalatyn aýyldaǵy mektep mýzeıinde turǵanyn burynnan biletin edik. Jurtqa ortaq jádigerge aınalǵan murany mektepke osydan 30 jyldan astam ýaqyt buryn shaıyrdyń uly Ábdiraýyq aqsaqal tabystaǵan eken.
Eki myńǵa jýyq mura toptastyrǵan mýzeıdiń negizi 1973 jyly qalanypty. Osy jyly Qazaq KSR-i oqý isiniń úzdigi, metodıst muǵalim Qarajan Qojabaevtyń bastamasymen № 29 mekteptegi qazaq tili men ádebıeti páni kabınetinen «Syr eli – jyr eli» dep atalatyn burysh ashylady. Muǵalimder men oqýshylardyń izdenisteri arqyly eń alǵash osy buryshqa jergilikti aqyn-jyrshylar shyǵarmalary, ómir derekteri jınaqtalypty. Keıinnen málimeti molyqqan burysh murajaıǵa aınalyp shyǵa keledi. Osy istiń basy-qasynda júrgender Turmaǵambet shaıyrdyń 100 jyldyǵyna oraı málimetter tolyqtyrylyp, zertteý jumystary jandana túskenin aıtady. 1989 jyly bala sanynyń ósýine oraı mektep janynan qosymsha mektep ǵımaraty boı kóterip, murajaı jańa mekteptiń bir bólmesine kóshirilipti.
«Ol kezde mektep dırektory Darıha Ámzebekova apaı bolatyn. Jańa ǵımarattaǵy mýzeıdiń ashylý saltanatynda Turmaǵambet atamyzdyń balasy Ábdiraýyq ákemiz Syr súleıi kıgen shapan men taqııany tabystaǵan edi. Sol sátte murajaıdaǵy jádigerge aınalǵan zattar qatarynda shaıyr ustaǵan pyshaq pen onyń qyny, kózáınegi boldy. Turmaǵambet atamyzdyń Shyǵystyń shoq juldyzy Ferdoýsıdiń «Shahnamasyn» 10 aıda 11 býynmen tárjimalaǵanyn bilesizder. «Shahnamanyń» mashınkaǵa alǵash basylǵan nusqasy da eki kitap bolyp osy mýzeıde saqtalyp tur», deıdi kezinde mektep basqaryp, zeınetke shyqqan ulaǵatty ustaz Zarıpa Tasymova.
Bes bólimnen turatyn mektep mýzeıinde soqpaǵyn Jıenbaı jyraý salǵan jyr mektebiniń úzdik ókili Kósheneı Rústembekovke, Syrdaǵy sal óneriniń kórnekti tulǵasy Eshnııaz saldan bastap kúni búginge deıingi jergilikti jyraýlarǵa, shejireshi Úbisultan Aıapov, Álıakbar Jumataev, Zapa Dáýletbaevqa arnalǵan bólimder bar. Osy topyraqqa qatysty tarıh pen Keńes Odaǵynyń Batyry Táıimbet Kómekbaev, Sosıalıstik Eńbek Eri, batyr ana Sálıma Jumabekova jaıly derekterdi de osy jerden tabasyz.
Mektep dırektorlyǵynan buryn uzaq jyldar tárbıe isi jónindegi orynbasar bolǵan Zarıpa Japparqyzy oqýshylar men muǵalimderdiń birlesip zertteýi arqyly mýzeı muraǵattary jyl saıyn tolyǵa túskenin aıtady. Mektep dırektory bolǵan jyldary óz qarajatymen mýzeıdi tolyq qaıta jabdyqtap shyǵypty.
Syrttan arnaıy kelip, mundaǵy muraǵattar deregin dıplom, ǵylymı joba jazýǵa paıdalanatyndar kóp. О́lketaný sabaqtary, aıtys, túrli jyr baıqaýlary osynda ótedi.
О́lke tarıhy qattalǵan mektep murajaıy osylaısha kóp qazynasyna aınalyp otyr.
Qyzylorda