Belgili ánshi Álı Oqapov jary Aqerke Búrkitbaıǵa qalaı sóz salǵanyn aıtyp berdi, dep habarlaıdy Egemen.kz.
Ánshi Dinara Satzhan arnasyna bergen suhbatynda súıiktisine karantın kezinde sóz salyp, úılenýge usynys jasaǵanyn jetkizdi.
“Pandemııa kezinde qalanyń joǵarǵy jaǵynda turdyq. Jarty jyl buryn ǵana jańa páterge kóship keldik. Jóndeý jumystary tolyq aıaqtaldy. Anam jáne Mádı úsheýimiz bir úıde turyp jatqan edik. Karantınniń qaı ýaqytta aıaqtalatynyn eshkim bilmeıdi. Bir kúni anama úılenetinimdi aıttym. Biraq birden júzik syılap sóz salýǵa qarajat joq dedim. Anam birden túsindi de, áshekeı buıymǵa toly qobdıshasyn aldyma ákelip shashyp tastady. Buryn-sońdy qyzdardyń buıymdaryn ustap kórmegenmin. Tańdaý qıyn boldy. Maǵan altyn unamaıtyn. Qobdıshadan shyqqan buıymnyń bári – altyn áshekeıler. Kózime túskeni kúmis júzik boldy. Sony tańdap turǵanda anam kúlip, “Talǵamyń jaqsy eken, Italııadan ákelgen aq altynǵa kóziń tústi” dedi, – dep ánshi eske alady sol kúndi.
Ánshi qalyńdyǵyna qaı jerde sóz salý keregin uzaq oılastyrǵan.
“Endi qalaı sóz salam dep úsh apta oılandym. Bir jaqqa shyǵýǵa da bolmaıdy. Kafe, meıramhananyń bári jabyq. Sosyn taýǵa shyǵyp kettik. Sol jerde úılenýge usynys jasadym. Týǵan jeri Atyraýǵa quda túsip, uzatyp alyp keldik”, – deıdi ánshi.
Osy kezde áńgimege Aqerkeniń ózi aralasty.
“Kelin bolǵasyn jańa ortaǵa beıimdelýge tyrysasyń. Elimizge tanymal otbasy bolsa da qazaqy mentalıtette ómir súredi. Zeıin týǵanda besikke salý rásimin jasadyq. Qazir qalanyń adamdary besikke jatqyzbaıdy. Sońǵy aılarda ǵana besikten shyǵarýdy oılap júrmiz. О́ıtkeni aýnap, domalap erkin jatsyn deımiz. Bala kútimimen úıde otyrǵan degen atym bolmasa, konsert pen keshterde óner kórsetemin. Sondaı kezde jartylaı daıyndalǵan ónimderdi jetkizip beretin kómekshi ápkemiz bar. Úıde bolǵanda tańǵy as pen keshki asty ǵana daıyndaımyn. Túste barlyǵymyz jumysta bolamyz. Qys kele jatqasyn soǵym alý, et tuzdaý, jilikteý sekildi jumysty anamyzǵa tapsyrǵanbyz. Sol kisi bárin rettep otyrady”, – deıdi Asyl tobynyń solısi.