Astanadaǵy Erkeǵalı Rahmadıev atyndaǵy Memlekettik akademııalyq fılarmonııasy «Saryarqa» halyq mýzykalyq ansambliniń XXVI konserttik maýsymy tanymal mýzykant, kompozıtor Qarakóz Gasımovanyń «Jetigen – ańyz» atty shyǵarmashylyq konsertimen ashyldy.
Talantty ónerpazdyń sıqyrly sazǵa toly keshi «Astana Opera» teatrynyń Kúlásh Baıseıitova atyndaǵy Kameralyq zalynda ótti.
Jetigen – kóneden kele jatqan kópishekti mýzykalyq aspap. Onyń jasalýy da, oınaý ádisi de kúrdeli. Ertede halqymyz jetigenniń ishegin attyń qylynan taǵyp, tıektiń ornyna asyqtar paıdalanylǵan desedi. Aspaptyń qulaq kúıin osy asyqtardy árli-berli jyljytyp keltirgen.
Jalpy, jetigenge arnap jazylǵan shyǵarmalar óte az. Bir jaǵynan, jetigende oınaıtyn kásibı mýzykanttar da sanaýly. Sol sanaýlylardyń biregeıi dep Qarakózdi aıtýǵa bolady. Ol jetigendi sheber oınap qana qoımaı, onyń repertýaryn jańa týyndylarmen baıytyp, kóne mýzykalyq aspabymyzdy tyńdarmanǵa tanymal etýge súbeli úles qosyp júrgen ónerpaz.
Konsert barysynda daryndy mýzykanttyń jetigenmen oryndaǵan shyǵarmalarynda halqymyzdyń ańyz-áńgimelerinde aıtylatyn oqıǵalar, jyl mezgilderi áýezdi sazben aıshyqty órnektelgen. Jetigenniń ásem úni de ózgeshe, tyńdaǵan adamdy birden elitip áketedi. Sondaı-aq sahnada jetigenmen birge sazsyrnaı, sybyzǵy, sherter, adyrna, dombyra, qobyz sekildi aspaptarymyzǵa jazylǵan tamasha týyndylar oınaldy. «Saryarqa» halyq mýzykalyq ansambli músheleri oryndaǵan shyǵarmalar tyńdarmannyń qulaq quryshyn qandyrdy.
Qarakóz Gasımovanyń taǵy bir qyry – kompozıtorlyǵy. Onyń «Kók bóriler», «Ańyz dala», «Aryn», «Kóktem áýeni», «Syrly dala», «Jibek joly» atty týyndylary ónersúıer qaýymǵa jaqsy tanys. О́ner keshinde kompozıtordyń «Senim», «Anama», «Sharyn shatqaly», «Týǵan jer», «Uly dala» sekildi shuraıly shyǵarmalary da oryndaldy.